Климатските промени годинава ќе ги намалат квалитетот и родот на оризот во Кочанскиот Регион. Од Националната мрежа на земјоделци велат дека високата дневна и ниската вечерна температура директно влијаат врз кластот и оризовото зрно.
– И оваа сега реколта што ја очекуваме ќе биде различна, некаде ќе биде квалитетна во зависност од временските периоди и сеидба. Климатските услови се променети. Вечерите се многу ладни, деновите не се наклонети кон оризот, така што сега тие сончеви 160 дена што ги очекуваме ќе ги немаме и не можеме да се пофалиме дека ќе имаме добар род – велат земјоделците.
Освен климатските промени, тие велат дека влијае и третирањето со препаратите, со што класовите остануваат мали, не можат да се оплодат и да дадат доволен род.
–Тоа се климатските промени на температурата од висока дневна на ниска вечерна и тогаш самото зрно не може да се оплоди и останува празно. Еден ваков клас треба да има од 150 до 180 зрна, се плашиме дека ќе дојдеме до 100 – изјави Тони Максимов, координатор за ориз во Националната мрежа на земјоделци.
Оризопроизводителите од Кочанско чекаат да ги потпишат и договорите за откуп на оризовата арпа за стоковните резерви. Предвидено е да се откупат околу 2.400 тони. Според процените на оризопроизводителите, годинава под ориз се засеани 4.500 хектари.
