Лувр ќе ги зголеми цените на билетите за повеќето посетители надвор од Европската унија за 45 проценти од почетокот на следната година, одлучи одборот на директори на музејот.
Туристите од САД, Велика Британија, Кина и други земји ќе мора да платат 32 евра за влез, а зголемувањето треба да обезбеди милиони евра за планираните реконструкции, пишува Би-Би-Си.
Ова беше одлучено по грабежот во октомври, кога група од четворица украде накит во вредност од 102 милиони долари. Ревизијата спроведена по инцидентот укажа на застарени безбедносни системи и проблеми со инфраструктурата.
Од 14 јануари, посетителите од земјите надвор од Европската економска зона ќе платат дополнителни 10 евра за влез во музејот, кој минатата година пречека речиси девет милиони луѓе, претежно странски туристи. Повеќе од 10 проценти од посетителите доаѓаат од САД, а околу шест проценти од Кина.
Со години, музејот се соочува со критики за пренатрупаност, долги редици и ограничен капацитет. Францускиот претседател Емануел Макрон и раководството на музејот во јануари објавија мерки за подобрување на искуството на посетителите, вклучувајќи план за преместување на „Мона Лиза“ од Леонардо да Винчи во нов простор за да се намали пренатрупаноста.
Лувр, исто така, планира обемна реконструкција на други делови од музејот, како и додавање нови објекти како што се тоалети и ресторани, што ќе чини стотици милиони евра.
Порано овој месец, галеријата за грчка керамика беше затворена поради структурни проблеми. Истрагата за грабежот покажа дека во последните години музејот инвестирал повеќе во купување уметнички дела отколку во одржување и реставрација.
