За цена на стан во Европа, купил цело село во Шпанија – ќе го прави туристичка атракција/ВИДЕО

Американскиот претприемач Џејсон Ли Беквит го купи напуштеното село Салто де Кастро во Шпанија за 310.000 евра, сума споредлива со цената на поголем стан во многу европски градови. Селото, празно од 1989 година, планира да го трансформира во туристичка дестинација.

Салто де Кастро, познато и како Побладо де Кастро, се наоѓа во покраината Замора, по должината на границата со Португалија и реката Дуеро. Населбата е изградена во 1940-тите и 1950-тите од компанијата Ибердрола за сместување на работниците ангажирани во изградбата на блиската брана и хидроцентрала.

Во тоа време, селото имало 44 куќи, црква, училиште, бар, пансион и станица за цивилна стража. По завршувањето на работата, интересот за живеење на локацијата исчезнал, па селото било напуштено и на крајот запоставено, завршувајќи на листата на загрозено културно наследство.

Беквит, директор на калифорниската компанија Рокинг Хоспитилити, дознал за селото преку интернет. Откако ја посетил, решил да го купи, а за да ја финансира инвестицијата, го продал својот пансион во Калифорнија. Планира да се пресели во Шпанија со сопругата и лично да управува со реновирањето.

@newstalkfmJason Lee Beckwith and his wife are moving from California to Spain, after purchasing the abandoned village of Salto de Castro for the sum of €300,000. He tells Sean Moncrieff of his plans for the town.

♬ original sound – Newstalk

Неговата идеја е да го претвори селото во туристички комплекс со концепт „од фарма до маса“, со фокус на локалното производство и одржливост. Постојните куќи ќе бидат претворени во вили и станови, а планиран е и хотел за планинари, со вкупно 184 кревети.

Проектот вклучува ресторан, бар, базени, спортски терени и спа центар, додека црквата е наменета да стане простор за разни настани. Планот вклучува и лозја и сопствена винарија, како и промоција на локални производи како што се говедско месо од Алиста, диви печурки, мед и костени. Се проценува дека проектот би можел да создаде околу 35 работни места.

Додека локалните власти го гледаат ова како можност за економско закрепнување и борба против депопулацијата, некои еколошки здруженија предупредуваат на можното влијание врз заштитениот природен парк Арибес дел Дуеро. Останува прашањето дали развојот на туризмот може да се усогласи со зачувувањето на природата.