Вучиќ во Одеса разговараше со Зеленски за важноста од постигнување долгорочен мир

Српскиот претседател Александар Вучиќ денес за време на самитот Украина-Југоисточна Европа во Одеса се сретна со грчкиот премиер Киријакос Мицотакис и нагласи дека разговарале за состојбата во регионот, безбедноста и економските предизвици.

„Иако кратка, секогаш добра средба со мојот пријател Киријакос Мицотакис, со кого разменив мислења за состојбата во регионот, безбедносните и економските предизвици, како и за главните прашања на нашите билатерални односи“, рече Вучиќ во објава на Инстаграм.

Како што додаде, во разговорот нагласил дека интензивните контакти и силната доверба меѓу Србија и Грција се еден од столбовите на стабилноста на Западен Балкан и дека заедничките проекти од заемен интерес дополнително ќе ги зајакнат пријателските односи и економската соработка меѓу двете земји.

Со Зеленски за важноста од постигнување долгорочен и одржлив мир
Претседателот Вучиќ денес во Одеса се сретна со претседателот на Украина Володимир Зеленски и нагласи дека разговарале за важноста од постигнување долгорочен и одржлив мир, почитување на меѓународното право, како и улогата на дипломатијата во надминувањето на конфликтите.

Вучиќ објави на Инстаграм дека имал значаен и отворен разговор со Зеленски за клучните прашања на современите геополитички предизвици со кои се соочува Европа и целиот свет.

„Разговаравме и за економски теми, како и за заедничките цели за постигнување на најсилна можна заедничка соработка во различни општествени сфери како основа на целиот понатамошен напредок“, додаде Вучиќ.