Вучиќ вели дека „веројатно згрешил што ги нарекол европратениците ѓубриња“: Да бидам целосно искрен – имам многу полошо мислење за нив

Српскиот претседател Александар Вучиќ оцени дека претставниците на опозициските партии кои денес зборуваа во Стразбур покажаа „недостаток на морален кредибилитет“, пренесе „Бета“.

Некои претставници на пет српски опозициски партии, кои денес разговараа со европратениците во Стразбур за актуелната политичка состојба во Србија, побараа воведување санкции против претседателот Александар Вучиќ и други високи државни функционери.

Вучиќ, гостувајќи на Прва телевизија, рече дека опозицијата отишла предалеку и дека нивното барање за воведување санкции против оние на власт всушност е насочено против државата и народот.

Според него, на претставниците на опозицијата им недостасува план, програма и идеи.

Вучиќ вели дека веројатно погрешил што ги нарекол европратениците од Европската зелена партија ѓубре откако присуствувале на студентски протест во Нови Сад, но потоа рече дека мисли многу полошо за нив.

„Велат дека ги навредив затоа што реков дека се ѓубриња. Да бидам целосно искрен – мислам многу полошо за нив. Но, дали згрешив што ги нареков така, веројатно згрешив – претседателот на државата не треба да го користи тој збор во јавниот дискурс“, рече Вучиќ.

Според него, тие дошле да учествуваат во „насилни демонстрации, да спроведат насилство во друга земја, а потоа ја лажеле и измамиле јавноста за тоа што се случило“.

Вучиќ тврди дека сите виделе што се случило на тој протест и кој кого нападнал, тврдејќи дека полицијата мирно стоела и ги издржала нападите на протестот во Нови Сад пред интервенцијата.