Вучиќ бара од САД лиценца за НИС: „Веќе не молам, туку барам“

„Сè уште не знам каква е американската одлука за Нафтената индустрија на Србија (НИС), но ги повикувам да донесат позитивна одлука и да ни дадат лиценца“, изјави синоќа српскиот претседател Александар Вучиќ во Мионица, додавајќи дека вчера „молел, а вечерва бара“ на Србија да ѝ се даде лиценца, бидејќи никому не ѝ наштетила.

„Вчера реков – ги молам Американците да го сторат ова за нас, а потоа се прашувам зошто молев. Па си велам: се молев за мојот народ, а не за себе“, рече Вучиќ на предизборниот митинг на Српската напредна партија пред локалните избори на 30 ноември.

„Денес е 48-миот ден откако ниту една капка нафта не влезе преку нафтоводот од Хрватска. Хрватите, како наши пријатели, го исклучија снабдувањето со нафта првиот ден, а поминаа 48 дена. Дали има една бензинска пумпа што остана без гориво? Нема, бидејќи некој домаќински се грижеше за сè“, рече Вучиќ.

Вучиќ повтори дека Србија нема да одземе ништо од никого преку ноќ, но дава рок од 50 дена за да се најде решение за сопственоста во НИС.

„Во оваа криза покажавме што значи да се има лице. Во тешка ситуација, не ја уништивме сопствената политика, не паничивме ниту ги оштетивме пријателствата – ниту со оние што ни воведоа санкции, ниту со оние од кои можевме да конфискуваме имот“, рече Вучиќ.

Нафтената индустрија на Србија (НИС) е под притисок поради меѓународните санкции воведени врз руската државна компанија Газпром Нефт, која има мнозински удел во НИС.

По руската инвазија на Украина, САД и ЕУ воведоа низа мерки што влијаат на рускиот енергетски сектор, а сите трети земји што соработуваат со руски државни компании мора да добијат посебни лиценци за да продолжат со увоз и преработка на енергетски производи.

Без американска лиценца, Србија би можела да се соочи со ограничувања во снабдувањето со сурова нафта, што директно би влијаело на функционирањето на НИС и на домашниот пазар на горива.

Дополнителна компликација е одлуката на Хрватска, која на почетокот на октомври го суспендираше протокот на нафта преку нафтоводот ЈАНАФ, наведувајќи го почитувањето на европските санкции против руските енергетски субјекти.

Ова ја остави Србија без својот клучен пат за снабдување, поради што се потпира на алтернативни и поскапи патишта и политички притисок врз Вашингтон за да добие изземање.