Врховниот суд на САД ги поништува глобалните царини на Трамп – пристигна и првата реакција на ЕУ

Врховниот суд на САД во Вашингтон денес пресуди дека широк спектар на глобални тарифи наметнати од претседателот Доналд Трамп се пречекорени.

Судот пресуди дека Трамп ги пречекорил своите овластувања кога го искористил федералниот закон за вонредна состојба за да воведе реципрочни тарифи низ целиот свет, објави „Блумберг“.

Одлуката се однесува и на целните увозни даноци што администрацијата ги оправда со борба против трговијата со фентанил.

Се очекува пресудата да има широки импликации врз трговските договори и политики на САД, како и врз глобалните пазари, објавија американските медиуми.

Европската унија повика на стабилност во трансатлантските трговски односи откако Врховниот суд на Соединетите Американски Држави ги поништи сеопфатните царини на претседателот Доналд Трамп со пресуда од 6-3, пишува „Политико“.

„Во близок контакт сме со американската администрација и чекаме разјаснување за чекорите што тие планираат да ги преземат како одговор на оваа пресуда“, изјави Олоф Гил, заменик-главен портпарол на Европската комисија. „Компаниите од двете страни на Атлантикот зависат од стабилноста и предвидливоста во трговските односи. Затоа продолжуваме да се залагаме за ниски царини и да работиме на нивно намалување“, додаде Гил.

Преовладувачкото очекување во Европската Унија е дека администрацијата на Трамп повторно ќе воведе царини преку други средства, како што е преку истраги според Член 232, кој веќе воведе царини за европски челик и алуминиум во минатото.

„Ја следевме оваа одлука, но очекуваме американската администрација да користи други правни инструменти за повторно воведување царини“, изјави француски дипломат за „Политико“.