Времето за мир истекува! Хамас со снимки на изгладнети заложници сака да го притисне Израел на прекин на огнот

Видео снимката од изгладнетиот израелски заложник Евијатар Давид, за кого Хамас тврдеше дека си го копа сопствениот гроб во тунелот каде што бил држен, го шокираа светот.

Хамас, заедно со ужасните слики од своите заложници, рече дека заложниците гладуваат заедно со своите киднапери и дека времето за прекин на огнот истекува. Движењето продолжува да инсистира дека еден од условите за постигнување договор е создавање независна палестинска држава, што Израел го отфрла.

Израелскиот премиер Бенјамин Нетанјаху го обвини Хамас дека не сака да постигне договор за прекин на огнот и побара од Меѓународниот Црвен крст да достави храна и медицинска помош за заложниците во Газа.

– Кога ги гледам овие видеа, точно разбирам што сака Хамас. Тие не сакаат договор. Тие сакаат да нè скршат со овие ужасни видеа, со лажната пропаганда на ужас што ја шират низ целиот свет – рече Нетанјаху.

Иако притисокот од светските лидери и меѓународната заедница расте за воспоставување мир во Појасот Газа по речиси две години војна, сè уште нема поголеми чекори кон негово воспоставување. Индиректните преговори меѓу Хамас и Израел, кои имаа за цел да постигнат 60-дневен прекин на огнот во војната во Газа и договор за ослободување на заложниците, во меѓувреме завршија без успех, по повлекувањето на делегациите на САД и Израел од разговорите во Катар.

Специјалниот претставник на САД за Блискиот Исток, Стив Виткоф, кој го посети регионот минатата недела, нагласи дека мисијата на шефот на Белата куќа, Доналд Трамп, е да ги врати сите заложници дома, но во исто време додаде дека нема информации за напредокот на преговорите со Хамас за ослободување на киднапираните.

Иако точниот број на заложници што Хамас сè уште ги држи во Газа на непозната локација не е познат, западните медиуми шпекулираат дека има 49 од нив. Од тие 49, израелската војска верува дека 27 не се живи.

Во меѓувреме, повеќе од десетина демократски конгресмени потпишаа писмо со кое бараат од администрацијата на Трамп да признае палестинска држава. Американските медиуми известуваат дека дури и некои републиканци и демократи, кои инаку се цврсти поддржувачи на Израел, ги засилија своите критики кон раководството на Тел Авив во последните недели, како одговор на растечките извештаи за гладување во окупираната палестинска енклава.

Хамас објави снимка од изгладнет израелски заложник /видео