Во услови на пораст на прекуграничниот железнички сообраќај во Европа, неусогласените национални возни редови прават проблеми на патничките и товарните возови што се движат по истите пруги, но со различни брзини и со различни распореди на запирање.
За надминување на проблемот, Советот на ЕУ и Европскиот парламент постигнаа прелиминарен договор да се направат измени на Европската рамка за управување со железничките капацитети, со кои се воведуваат дополнителни општи правила за планирање, распоредување, распределба и презакажување на термини на железничката мрежа на ЕУ, како резултат на процесите на дигитализацијата на железничките услуги.
Со измените, националните управи за железничката инфраструктура и натаму ќе раководат со процесите на планирање на возните редови согласно со нивните цели и политички одлуки, но се зајакнува улогата на Европската мрежа на менаџери за инфраструктура (ЕНИМ) во делот на координацијата.
Новите правила ќе воведат долгорочно планирање на железничките услуги надвор од годишниот работен распоред, а исто така ќе го олеснат планирањето на дополнителни железнички услуги во краток рок.
ЕНИМ ќе биде задолжена за изработка на европска рамка за управување со капацитетите, која ќе служи како патоказ за секоја од националните железнички управи за планирање на железничките услуги, потоа на рамка за координација на управувањето со прекуграничниот сообраќај, како и на рамка за следење на развојот на железничкиот транспорт.
Постигнатиот привремен договор сега треба да биде потврден и формално усвоен од Советот на ЕУ и од Европскиот парламент. Целта на овие измени е зголемување на железничкиот товарен сообраќај за 50% до 2030 година и за негово удвојување до 2050 година.
Според оценките на ЕУ, за постигнување на овие цели, железничкиот транспорт мора да стане поприфатлив, посигурен и подостапен, нудејќи услуги согласно со потребите на патниците и на бизнисите.
