„Возот на пивото“ ве води директно од Рим на „Октоберфест“ во Минхен

Италија штотуку пушти во сообраќај нов ноќен воз со вагони за спиење, познат како „воз на пивото“, кој ќе ги превезува патниците од Рим директно до Минхен, на  познатиот Октоберфест.

Овој воз, наречен Минхен Експрес (Еспресо Монако), работи во рамките на италијанската државна компанија FS Treni Turistici Italiani.

Станува збор за посебна линија со баварска тематика која им нуди на патниците незаборавно 16-часовно патување со танцување, пиво и вечера во возот.

„Заборавете на стресот од возењето и непотребните запирања. Со нас, забавата започнува штом ќе се качите на возот“, се наведува во соопштението на операторот.

Патниците можат да уживаат во традиционални закуски, свежо точени пива и баварска музика, пред да се повлечат да спијат во седиштата, кушет вагоните или вагоните за спиење.

Обожавателите на Октоберфест можат да резервираат кабини за едно или две лица, или кабина со четири кревети за целото семејство, додека самиот пат води низ прекрасни пејзажи: Фиренца, Верона, Болоња и Алпите.

Оваа специјална линија сообраќа само двапати – на 26 септември и 3 октомври.

Возот тргнува од станицата Термини во Рим во петок во 20:00 часот и пристигнува во Минхен следниот ден во 14:30 часот. Враќањето од Минхен е во недела во 14:30 часот, а пристигнувањето во Рим во понеделник во 06:30 часот.

Патниците можат да влезат и од други градови, како што се Тренто, Верона, Бриксен, Болкан, Випитено, Фортеца, Бренер и Кола Исарк.

Цените за „Минхен експрес“ по повод Октоберфест почнуваат од 99 евра по насока, а билетите може да се резервираат преку платформата Railbook.

Оние кои веднаш ќе резервираат повратен билет ќе платат 89 евра во секој правец.

Иако Италија вложува напори да го промовира патувањето во Минхен за Октоберфест, многу туристи го избираат Октоберфест во Берлин оваа година, сакајќи да ги избегнат големите гужви во Минхен.