Националната гарда на Соединетите Американски Држави, која веќе две недели патролира по улиците на Вашингтон по наредба на претседателот Доналд Трамп, почна да носи оружје во недела навечер, потврдија двајца функционери за Ројтерс.
Како што појаснија, гардистите ќе бидат вооружени со пиштоли М17 или пушки М4, но бројот на војници кои ќе имаат оружје не е прецизиран. Одлуката доаѓа откако министерот за одбрана Пит Хегсет минатата недела се согласи да им дозволи на војниците да носат оружје. Во заедничка изјава од Командата на Националната гарда за Вашингтон, беше нагласено дека употребата на сила е дозволена „само како последно средство и само во случај на непосредна закана од смрт или сериозни повреди“.
Трамп објави дека може да ја прошири својата „остра борба против криминалот“ и во други градови управувани од демократите. Во неделата, тој конкретно ги спомена Чикаго и Балтимор, сугерирајќи ја можноста за испраќање на војската и таму, пренесува Аваз.
Лидерот на демократите во Претставничкиот дом, Хаким Џефрис, рече дека Трамп нема законско право да ја испрати војската во Чикаго, додека Пентагон веќе почна да ги прави првите планови за евентуална интервенција. Претставници на Министерството за одбрана, кои зборуваа анонимно, нагласија дека станува збор за рутинско планирање за различни сценарија, без конкретни одлуки. Џефрис ги оцени потезите на Белата куќа како обид за „производство на криза“, потсетувајќи дека стапката на убиства во Чикаго минатата година беше во опаѓање.
Гувернерот на Илиноис, демократот Џ.Б. Прикер, исто така рече дека нема потреба од распоредување на Националната гарда.
Трамп продолжи да ги критикува демократските гувернери, вклучувајќи го и Вес Мур од Мериленд, и рече дека е подготвен да ја испрати војската и во Балтимор. Сепак, податоците од тој град покажуваат двоцифрен пад на вооруженото насилство, а бројот на убиства оваа година е најнизок во последните 50 години.
Иако Трамп тврди дека благодарение на војската и федералните агенти, криминалот во Вашингтон е „исчистен“, официјалната статистика покажува дека падот на криминалот започнал уште пред неговите мерки. За разлика од главниот град, над кој претседателот има директна власт, неговата моќ над градови како Чикаго и Балтимор е ограничена.
Трамп се повика на член 12406 од федералниот Закон за вооружени служби, кој му дозволува да ја испрати Националната гарда во случај на инвазија, бунт или потреба од спроведување на законот. Сепак, секој обид за спроведување на таа одредба во демократските градови речиси сигурно би отворил правни спорови.
