Трамп до Зеленски: Сакам војната во Украина да заврши до лето

Во телефонски разговор со украинскиот лидер Володимир Зеленски, американскиот претседател Доналд Трамп ја изразил својата желба што е можно поскоро да се заврши војната во Украина, со цел да се постигне мировен договор до летото, објавува „Аксиос“, повикувајќи се на украински функционер и други извори запознаени со разговорот.

Според истите извори, сè уште постојат големи разлики меѓу Украина и Русија, особено околу територијалната контрола на истокот од земјата.

Получасовниот телефонски разговор беше првиот контакт меѓу двајцата лидери по состанокот во Давос на крајот на јануари. Разговорот се одржа еден ден по четвртата годишнина од почетокот на руската инвазија и пред состанокот на американските претставници Џаред Кушнер и Стив Виткоф со украинскиот преговарачки тим во Женева. Кушнер и Виткоф, исто така, учествуваа во разговорот со Зеленски.

Три извори го опишаа разговорот како многу пријателски и позитивен. Зеленски му се заблагодари на Трамп за неговата досегашна помош и нагласи дека само тој може да влијае врз рускиот претседател Владимир Путин да ја запре војната. Трамп изјави дека конфликтот трае предолго и дека сака тој да заврши што е можно поскоро, дури и во рок од еден месец.

Една од темите беше можна средба на лидерите на САД, Украина и Русија. Зеленски претходно изјави дека преостанатите разлики околу територијалните прашања можат да се надминат преку директни разговори меѓу него, Трамп и Путин.

Трамп, исто така, изрази подготвеност да понуди значајни безбедносни гаранции од САД за Украина како дел од потенцијален мировен договор. Според планот, средба на тројцата лидери би можела да се организира доколку преговорите меѓу американскиот, рускиот и украинскиот претставник на почетокот на март покажат напредок.