Во Турција се уапсени комичар и рапер поради шега направена онлајн – според обвинителите станува збор за коментар навредлив за исламот

Турските власти ги уапсија комичарот Богач Сојдемир и раперот Енес Акгундуз откако направија онлајн шега за која обвинителите велат дека се однесува на хадис, или на учењата на пророкот Мухамед, и дека може да поттикне верска омраза, објави „Радио Слободна Европа“.

Судот во Истанбул нареди притвор на Сојдемир, водителот на емисијата „Согук Савас“, и неговиот гостин Акгундуз за коментари за хадисот: „Алкохолот е мајка на секое зло“.

Обвинителите велат дека содржината на емисијата може да поттикне верска омраза, објави „Ројтерс“.

Двајцата мажи се извинија и се изјаснија за невини пред судот, велејќи дека шегата била коментар од гледач кој погрешно ја разбрал како игра на зборови.

Сојдемир го отстрани видеото и се извини на социјалните мрежи, додека Акгундуз рече дека разговорот бил погрешно протолкуван.

Случајот доаѓа откако четворица карикатуристи од сатиричкото списание „Леман“ претходно беа затворени за карикатура на која наводно беа прикажани пророците Мухамед и Мојсеј, што претседателот Реџеп Таип Ердоган го нарече „одвратна провокација“.