Во средното училиште „Владо Тасевски“ нова стручна квалификација – специјалист за мехатроника на камиони

Во средното училиште „Владо Тасевски“ во Скопје се воведува нова образовна квалификација – специјалист за мехатроника на камиони и тешки возила, а наставата ќе се реализира во соработка со шведската автомобилска компанија „Волво груп“, информираше министерката за образование и наука, Весна Јаневска.

На почетокот, квалификацијата ќе се нуди како неформално образование за возрасни, а се очекува следната година да стане дел од системот на формално стручно образование.

Јаневска, заедно со шведската министерка за европски прашања, Џесика Розенкрац и повеќе претставници на „Волво“, шведската амбасада и на швајцарската развојна организација „Хелветас“, го посетија училиштето каде што остварија средба со училишното раководство, наставниците и со учениците.

– Среќна сум што Македонија добива нови партнери во заложбите за континуиран развој на средното стручно образование, кое нема да биде скромно ако кажам дека е силна страна на националниот образовен систем и затоа мора да продолжи постојано да се надградува. Очекувам да има интерес за новата квалификација затоа што според регионално истражување, таа е навистина побарувана – истакна Јаневска.

Квалификацијата – специјалист за мехатроника на камиони и тешки возила е овозможена преку склучен меморандум за соработка на Министерството за образование и наука и Швајцарската развојна организација „Хелветас“, во рамки на регионалната програма RECONOMY, финансирана од Шведската агенција за меѓународна развојна соработка „Sida“.