Град Скопје кој започна во исто време со градовите во регионот како Подгорица, Приштина и Бања Лука, е во најнапредна фаза на изградба на новата пречистителна станица за отпадни води, најголемиот еко-капитален проект во регионот.
Проектот го имплементира ЈП Водовод и канализација – Скопје, со силна поддршка од Европската Унија преку Европската банка за обнова и развој (ЕБОР) и Европската инвестициска банка (ЕИБ) за изградба на современа централна пречистителна станица за отпадни води, лоцирана помеѓу општините Гази Баба и Аеродром, опфаќа проектна површина од 184.610 квадратни метри.
Овој еко-трансформативен проект вклучува изградба на 58 објекти, од кои повеќето веќе се во активна фаза на изградба, а вклучуваат пумпна станица за сирова вода со лев и десен колектор што се протега на 1050 квадрати, објект за прифаќање на површина од 470 квадратни метри, таложници за песок и маслофаќачи на површина од 1450 квадрати и дигестори кои зафаќаат површина од 2000 квадратни метри.
– Со изградбата на пречистителната станица се обезбедува примарен и секундарен третман, со користење на најсовремена технологија и опрема за биолошки третман на отпадни води. Овој проект има за цел значително да го подобри квалитетот на површинските и подземните води, со што ќе се придонесе за целокупно подобрување на состојбата на животна средина и здравјето на жителите на Скопје – велат од Град Скопје.
Проектот на Пречистителната станица на Скопје ги предводи еколошките иновации, со користење врвна технологија и опрема, со што претставува пример во тековните проекти во регионот.
– Овој проект е доказ за потенцијалот за соработка меѓу локалните власти и меѓународните партнери за справување со критичните еколошки предизвици, со цел подобрување на квалитетот на живот и зачувување на природните ресурси за идните генерации – потенцираат градските власти.
