Годинава, заклучно со 27.11.2025, пристигнати се пријави за 38
новорегистрирани лица на ХИВ/СИДА во Македонија, што претставува
инциденца од 2,1 на 100.000 жители. За споредба, инциденцата во земјите
на ЕУ/ЕЕА во 2024 била 5,3/100.000 жители, објави Инсититутт за јавно здравје по повод 1 декември, Светски ден за борба против СИДА
Бројот на случаи во 2025 година е помал за 25,5% споредено со истиот
период од 2024 година кога беше регистриран 51 случај (заклучно со
27.11.2024).
Од случаите во 2025 година, најголем дел (н=15) се со место на живеење
во Скопје со инциденца од 2,5/100.000 жители. Останатите случаи се
регистрираат како спорадични случаи во 14 градови од Македонија. Еден
случај во 2025 е странски државјанин. Во 2025 година, регистрирани се 8 смртни случаи поврзани со СИДА. Годинава, од регистрираните случаи, 37 се од машки пол, еден од женски пол. Возраста на случаите не отстапува значително од возрасната
дистрибуција од предходно пријавените случаи. Просечната возраст на
новите случаи е 35 години, а е во опсег од 23 до 64 година, 73,7% од случаите
се на возраст од 20 до 39 години.
Од анализата на пристигнатите пријави, од тие со достапен податок, се
забележува дека во однос на веројатниот ризик за стекнување на ХИВ
инфекција, регистрирани се 5 лица со хетеросексуална трансмисија и 29
лица од МСМ популацијата.
Македонија е земја со ниска преваленца на ХИВ, од 1987 до 2025
(заклучно со 27.11.2025) се регистрирани 726 случаи на ХИВ/СИДА, но во
последните години се бележи нагорен тренд, 32% од сите случаи се
регистрирани во последните пет години.
Кумулативно, од регистрираните случаи, 655 (90,2%) се од машки пол и
70 (9,6%) од женски пол. Високото пропорционално учество на машки лица
во бројот на новорегистрирани случаи е тренд во изминатите 15 години
Просечната возраст на регистрирани случаи кога била поставена
дијагнозата е 34 години (опсег од 0-85 години). Дистрибуцијата по возраст
укажува дека најзафатени се сексуално активни лица на возраст од 20-39
години кои чинат речиси три четвртини од дијагностицираните случаи.
На млади на возраст до 19 години отпаѓаат помалку од 2%
Во периодот од 1987 до 2025 година (заклучно со 27.11.2025), вкупно 138
од дијагностицираните лица во Македонија починале поради причини
поврзани со СИДА, што претставува стапка на смртност од 18,2%.
Со воведувањето на антиретровирусната терапија, преживувањето на
лицата кои живеат со ХИВ е значително подобрено, во последните 10 години
од 447 регистрирани случаи регистрирани се 33 смртни случаи што
претставува стапка на смртност од 7,4%. Најголем број од случаите се со место на живеење во Скопје – 291.
ХИВ останува главен глобален јавно-здравствен проблем, досега се
регистрирани околу 44,1 милиони смртни случаи. Трансмисијата на вирусот
се регистрира во сите земји на глобално ниво.
