Во кризни ситуации, Швеѓаните ќе можат да купуват основни производи со картички и без интернет

Шведската централна банка денес објави дека постигнала договор со компаниите за платежни услуги за воспоставување систем до средината на 2026 година што ќе им овозможи на граѓаните да вршат офлајн плаќања со картички за купување основни производи во случај на прекини во онлајн банкарството, пренесе „Хина“.

Швеѓаните ретко користат готовина, а властите стравуваат дека граѓаните би можеле да имаат тешкотии при купувањето во случај на технички проблеми во системите за онлајн плаќање.

Централната банка во соопштението наведува дека ќе можат да вршат офлајн плаќања со физички платежни картички и ПИН кодови од средината на следната година.

„Граѓаните ќе можат да плаќаат за работи како храна и лекови офлајн со своите картички, дури и во случај на сериозен прекин на податоците, што е пресвртница во нашите зголемени напори да бидеме поподготвени за вонредни ситуации“, рече гувернерот на „Риксбанк“, Ерик Тедин.

Од „Виза“ изјавија дека нивното искуство во други европски земји покажало дека решенијата за офлајн плаќање функционираат, „дури и за време на привремени широко распространети прекини во поврзувањето“.

„Со нетрпение очекуваме да соработуваме со „Риксбанк“ и нашите партнери за да го имплементираме овој (план) во наредните месеци. Луѓето со право очекуваат плаќањата секогаш да функционираат, безбедно и сигурно“, рече Филип Конопик, раководител на нордиските и балтичките земји на Виза, во е-пошта изјава до Ројтерс.

Норвешка и Данска веќе им нудат на граѓаните можност за офлајн електронски плаќања и го дотеруваат системот, а финскиот гувернер Туомас Валимаки изјави во мај дека ќе ги овозможат следната година.

Естонија, исто така, посочи дека ќе овозможи офлајн плаќања со картички следната година, во ограничена мера.

„Плаќањата со картички на граѓаните (офлајн – ур.) ќе бидат ограничени на одредени локации“, изјави во мај Рајнер Олт, директор на одделот за системи за плаќање и порамнување во естонската централна банка, според извештај на естонските медиуми.

„Секој граѓанин мора да одлучи во кризна ситуација што му е важно, продавницата за храна или аптеката, а исто така мора да знае колку пари му се потребни за да го наполни резервоарот за гориво“, објасни Олт.