Вo Кисела Вода ќе „никнат“ 500 нови садници

Голема акција за пошумување се реализира на територијата на општина Кисела Вода. Активностите се одвиваат во паркот „Иднина“, во 13 урбани и месни заедници, како и во сите основни училишта на територијата на општината.

Во рамки на акцијата ќе бидат засадени околу 500 садници, зимзелени и други видови дрвја.

Градоначалничката на Општина Кисела Вода, Бети Стаменкоска-Трајкоска, истакна дека пошумувањето е важен сегмент од долгорочната политика на Општина Кисела Вода, која се реализира плански и рамномерно на целата територија, со активно вклучување на училиштата и на локалната заедница, а воедно упати и благодарност до компанијата што ја поддржа акцијата со донација на садниците.

– Пошумувањето не е само симболичен чин, туку јасна и долгорочна определба на Општина Кисела Вода. Со секое засадено дрвце вложуваме во поквалитетен јавен простор и подобри услови за живот за сегашните и идните генерации. Нашата стратегија е системска и опфаќа пошумување во сите населени места, како и активно вклучување на училиштата и граѓаните – изјави Стаменкоска -Трајкоска.