Во Кичево и во Струмица надминат прагот на алармирање за аерочестички до 10 микрометри

На мерните места Кичево и Струмица е надминат прагот за алармирање за суспендирани честички со големина до 10 микрометри (надминување на вредноста од 150 милиграми на кубен метар во текот на два последователни дена), информира Министерството за животна средина и просторно планирање, повикувајќи се на податоците од Државниот автоматски мониторинг-систем за квалитетот на амбиенталниот воздух и на добиената временска прогноза од Управата за хидрометеоролошки работи.

Согласно со настанатата состојба, за Струмица важат мерките: да се интензивираат вонредните инспекциски надзори на инсталациите со А-интегрирана еколошка дозвола, да се интензивираат вонредните инспекциски надзори на терен за контрола на инсталациите со Б-интегрирани еколошки дозволи и елаборати, инсталациите со континуиран мониторинг да овозможат јавен пристап на измерените податоци, да се интензивираат вонредните контроли на техничката исправност на возилата, особено оние со дизел-горива и на оние нерегистрираните, да се интензивираат вонредните контроли на градилиштата и забрана за горење на отворено.

Од МЖСПП нагласуваат дека им се препорачува на сите правни субјекти (работодавци) да ги ослободат од работните обврски бремените жени, лицата постари од 60 години, како и лицата со хронична астма, прележан миокарден инфаркт или мозочен удар, без разлика на возраста, со препорака од матичен лекар. Потоа им се препорачува на сите правни субјекти (работодавци) да го реорганизираат работното време и лицата што работат на отворено, да работат од 11:00 до 17:00 часот и се препорачува да не се организираат спортски натпревари и други културни манифестации на отворено.