Во Италија воведени итни мерки поради недостиг на гориво: Ограничувања на дури четири аеродроми

Ограничувањата за гориво за авиони стапија на сила на италијанските аеродроми во Милано, Венеција, Тревизо и Болоња и ќе траат до 9 април, објави италијанската подружница на добавувачот, Ер БП.

Ограничувањата за гориво за авиони ги вклучуваат Линате во Милано, Марко Поло во Венеција, Гуљелмо Маркони во Болоња и аеродромот Тревизо, објави Скај њуз.

Во известувањето испратено до пилотите на аеродромите во Тревизо, Болоња и Венеција се наведува дека при дистрибуција на гориво за авиони, „приоритет ќе им се даде на летовите на брзата помош, владините летови и летовите што траат подолго од три часа“.

За сите други авиокомпании „кои работат со летови пократки од три часа, ќе важи максимална количина на гориво од 2.000 литри по авион“, што е доволно за просечен патнички авион за помалку од еден час лет.

На аеродромот во Милано не се воведени конкретни ограничувања, но на пилотите им е кажано дека има „намалена достапност на гориво за авиони А1“ до 9 април.

Во случајот со Венеција, од пилотите се бара да носат „доволна количина гориво од претходниот аеродром“ во авионот.

Меѓународното здружение за воздушен транспорт проценува дека околу 25 до 30 проценти од снабдувањето со гориво за авиони во Европа доаѓа од Персискиот Залив, кој во моментов е под закана поради војната во Иран и затворањето на Ормутскиот теснец.

Некои превозници веќе ги откажаа летовите поради зголемувањето на цените на горивата, додека неколку други ги зголемија цените на билетите или воведоа дополнителни трошоци.