Во Италија, 5,7 милиони луѓе живеат во апсолутна сиромаштија, странските државјани се нaјзагрозени

Во Италија, 5,7 милиони луѓе живеат во апсолутна сиромаштија, што претставува околу 9,8 проценти од вкупното население, при што странските државјани и големите семејства се особено изложени на ризик, според податоците објавени денес за 2024 година.

Италијанскиот национален институт за статистика (Istat) забележува дека повеќе од 2,2 милиони семејства, или 8,4 проценти од домаќинствата, се погодени од сиромаштија, што е стабилна бројка во споредба со 2023 година, објавува порталот Sole 24 Ore.

Сиромаштијата е најизразена кај странските државјани: 30,4 проценти од семејствата со барем еден странец се во апсолутна сиромаштија, додека тој процент се зголемува на 35,2 проценти за семејствата составени исклучиво од странци, објавува Танјуг.

Спротивно на тоа, стапката на сиромаштија кај семејствата на италијански државјани е 6,2 проценти.

Бројот на членови на домаќинството, исто така, влијае на ризикот. Сиромаштијата е најраспространета кај големите семејства со пет или повеќе членови (21,2 проценти), како и кај семејствата со четири члена (11,2 проценти), додека кај семејствата со три члена е 8,6 проценти.

Малите деца се особено ранливи, бидејќи повеќе од 1,28 милиони деца (13,8 проценти од сите малолетници) живеат во апсолутна сиромаштија, со највисока стапка во јужните региони (16,4 проценти) и највисока кај децата на возраст од 7 до 13 години (14,9 проценти), објавува ANSA.

„Истат“ забележува дека овие податоци не се значително променети во споредба со 2023 година, но додава дека тие укажуваат на долгорочната ранливост на странските државјани и големите семејства, особено со деца, што бара дополнителна поддршка и политики за социјална заштита.