Владата на САД прекина со работа, на удар се 800.000 работници

Сојузната влада на Соединетите Американски Држави официјално се затвори на полноќ по локално време за прв пат од 2019 година, откако Конгресот не успеа да ја усвои мерката за финансирање потребна за нејзино продолжување, објави CNN.

Затворањето започна откако гласањето во Сенатот за планот за финансирање на федералната влада не успеа, со 55 гласови „за“ и 45 „против“. Тоа значи дека агенциите на американската влада ќе мора да ги суспендираат сите освен основните активности како што е спроведувањето на законот почнувајќи од среда, што потенцијално ќе го наруши сè, од воздушниот сообраќај до месечниот извештај за вработување. Потребни беа 60 гласа „за“.

Републиканците и демократите не покажаа знаци дека ќе ги премостат своите поделби до крајниот рок на полноќ. Секој договор би требало да биде одобрен и од Претставничкиот дом контролиран од републиканците, кој не заседава.

Американскиот претседател Доналд Трамп само долеа „масло на огнот“. Пред гласањето во вторник, тој се закани дека ќе ги откаже програмите поддржани од демократите и ќе отпушти повеќе федерални службеници.

„Ќе отпуштиме многу луѓе“, им рече Трамп на новинарите.

На прашањето дали е загрижен за потенцијалната трајна штета, демократскиот сенатор Шелдон Вајтхаус за Си-Ен-Ен изјави: „Секако, кој не би бил? Имаме лудак на власт.“ Тој исто така рече дека клучната задача за демократите сега е „да се осигурат дека Трамп сноси целосна одговорност и ја плаќа политичката цена за сето ова.“

Министерството за транспорт на САД соопшти во вторникот дека повеќе од 11.000 вработени во Федералната администрација за воздухопловство, околу една четвртина од работната сила, ќе бидат суспендирани или отпуштени доколку се намали владиното финансирање.

За време на последното затворање во 2018 година, 340.000 од 800.000 федерални работници беа пратени на принуден одмор.