Владата на Џорџа Мелони презентира нова стратегија за арктичкиот регион

Владата на италијанска премиерка Џорџа Мелони денес презентираше нова комерцијална стратегија за арктичкиот регион, која има за цел зајакнување на безбедносната соработка и отворање на деловни можности во регионот, објави канцеларијата на Мелони.

Документот беше официјално презентиран во Рим од министерот за надворешни работи Антонио Тајани, министерот за одбрана Гвидо Кросето и министерката за универзитети и истражувања Ана Марија Бернини, а новата стратегија го одразува растечкото геополитичко и економско значење на арктичкиот север, додека американскиот претседател Доналд Трамп се стреми да го прошири американското влијание со стекнување или одземање на Гренланд од Данска, објавува „Политико“.

Во соопштението се вели дека Италија е „совршено свесна колку овој регион во светот претставува стратешки квадрант во глобалната рамнотежа“ и се додава дека ќе продолжи да работи на зачувување на Арктикот како „област на мир, соработка и просперитет“.

Се нагласува дека Арктикот мора „сè повеќе да биде приоритет за Европската Унија и НАТО“, апелирајќи до НАТО да развие координирано присуство во Гренланд со цел „да се спречат тензиите, да се зачува стабилноста и да се одговори на мешањето од други актери“.

Тајани најави дека ќе отпатува во Вашингтон во наредните недели за да разговара за суровините со американскиот државен секретар Марко Рубио и други партнери, наведувајќи дека Италија ќе започне „италијанска деловна мисија на Арктикот“.

Министерот за универзитети и истражување изјави дека Рим ќе биде домаќин на Римскиот форум за Арктичкиот круг, „Поларниот дијалог“, на почетокот на март, кој ќе ги собере претприемачите, одбранбените компании, научниците, истражувачите и политичарите за да разговараат за регионот.

Министерот за одбрана Гвидо Кросето го критикуваше фрагментираното национално распоредување на трупите во Гренланд.

„Италијанското Министерство за одбрана веќе некое време е фокусирано на Арктикот, а морнарицата, воздухопловните сили и армијата спроведуваат вежби кои не започнаа денес и кои сигурно не се поврзани со испраќањето на 15 војници во Гренланд“, рече Кросето.

„Замислете – 15 Италијанци, 15 Французи, 15 Германци, ми звучи како почеток на шега. Мислам дека е во наш интерес западниот свет да остане заедно, секогаш размислувајќи во однос на НАТО и Обединетите нации“, додаде Кросето.

Европските земји го зголемија својот интерес за Арктикот откако Данска, заедно со неколку сојузници, објавија планови оваа недела за зајакнување на своето воено присуство во Гренланд, по ескалацијата на реториката на американскиот претседател Доналд Трамп за американските претензии кон Гренланд, автономна данска територија.