Виртуозна изведба и бура од емоции од Петар Пејчиќ и „Профундис“ во Скопје; Многу аплаузи и бис на концертот под свеќи на „Охридско лето“

Публиката што ја исполни големата сала во Македонската филхармонија во Скопје завчеравечер уживаше во концертот насловен „Tајмлес“, кој под магијата на свеќите со многу емоции го изведоа ансамблот „Профундис“, маестра Ѓурѓица Дашиќ и виолончелистот Петар Пејчиќ

Камерниот оркестар „Профундис“, заедно со младиот виртуоз на виолончело, Петар Пејчиќ, и неговата совршена изведба, донесоа многу емоции и воодушевување на концертот под свеќи одржан вчеравечер во организација на фестивалот „Охридско лето“. Публиката што ја исполни големата сала во Македонската филхармонија во Скопје ги награди уметниците со голем аплауз, на што тие неколкупати се вратија на сцената.

Концертот започна со изведба на филмската музика од познатиот филм „Часови“ (The Hours) од 2002 година, дело со длабока емотивност и суптилни динамики што извонредно ја пренесува напнатоста и мистеријата на филмското дејство и го создава чувството на бескрајниот и незапирлив тек на „реката“ на времето. Делото на Филип Глас ексклузивно пред публиката го доловија ансамблот „Профундис“ под диригентската палка на маестра Ѓурѓица Дашиќ и солистката на пијано, Анастасија Грговска.

И целокупната програма на концертот насловен „Tајмлес“, според директорот на НУ „Охридско лето“, Ѓорѓи Цуцковски, беше емотивна и атрактивна за љубителите на класичната музика.

– На програмата беше и Унгарската рапсодија на Давид Попер, едно од најпознатите и највиртуозни дела за виолончело, кое секогаш предизвикува воодушевување поради неговата драматичност, техничка комплексност и раскошен карактер, и секако, поради моќта на солистичката изведба на совршениот Петар Пејчиќ. Беа изведени и рококо-варијациите на Чајковски, најелегантните и најчесто изведувани дела од романтизмот. Во целина, тоа беше програма која беше доста сензитивна, емотивна и пред сè, атрактивна за публиката, посочува Цуцковски.

Бура од емоции и топлина во срцето донесе и дополнителната изведба на Пејчиќ на извонредната „Карусо“ (Caruso) на Лучио Дала, најпозната за публиката по интерпретацијата на Андреа Бочели, која ги разнежи чувствата носејќи вистинско уживање за присутните под магијата на амбиентот од свеќи.

Со својата виртуозност, музикалност, неверојатна техника, сценски изглед и харизматична изведба, младиот виолончелист Петар Пејчиќ со години го привлекува вниманието на љубителите на класичната музика, насекаде. Тој, со исклучителна техника и со емоционална длабочина, изведува дела од најголемите композитори, создавајќи неповторлива музичка атмосфера која остава траен впечаток. Критичарите го нарекуваат „надарен музичар со огромен сценски шарм“. Таков силен впечаток остави и во Скопје.

Пред крајот на концертот, пак, маестра Дашиќ му оддаде чест на македонскиот виолинист Михаило Куфојанакис.

„Тој е човек кој својот живот им го посвети на уметноста, на виолинизмот, на своите студенти. Професор кој создаде плејада врвни виолинисти кои денеска со достоинство стојат пред вас и кои се столбот на двете национални институции, Македонската опера и балет и Македонската филхармонија, рече Дашиќ.

За врвно доживување на публиката, „Профундис“ го исполни и македонското „Капричо бр. 1“ од композиторот Драган Шуплевски.

Концертот беше исклучителна можност скопската публика повторно да го почувствува уметничкиот сензибилитет на „Профундис“, оркестар што со континуирана посветеност, автентичност и висок квалитет го гради своето место на македонската и на регионалната музичка сцена. (Н. И. Т.)