Познатата активистка за заштита на животните и вработена во Зоолошката градина, но и голем љубител на музиката и диџеј, Тина Мицковска, е решена во Скопје да направи Парк на македонската музика, каде што ќе бидат исцртани графити со стихови од македонски поп-песни, кои можат да се видат на социјалните мрежи.
Таа раскажува за тоа како дошла до идејата да се направат улични графити со најубавите македонски песни, а некои од нив, како што вели малку и подзаборавени.
– Сè почна со виртуелни графити со песните во заднина кои на „Инстаграм“ веднаш станаа вирални, а ги поддржаа и ги споделија сите наши најголеми музички ѕвезди – објаснува Мицковска за весникот ВЕЧЕР.
Таа вели дека сега останува да се направи Парк на македонската музика во Скопје.
– Всушност, во овој парк овие графити ќе бидат исцртани и во реалноста, не само вирално. Докажавме дека кај нас се цени и се слуша македонската музика и со тоа им дадовме ветар во грб на македонските артисти да творат и понатаму – нагласува Мицковска.
Таа додава дека овие графити ќе бидат исцртани од млади улични уметници и се надева дека тоа ќе биде во скоро време.
На овие виртуелни графити кои засега можат да се видат на социјалните мрежи се стихови од песните: Обои ме“ од Калиопи, „Немирна ко ветер“ од Тамара Тодевска, „Обиди се“ од Ребека, „Би се викал те сакам“ од „Нокаут“, „И ќе биде сѐ во ред“ од Каролина, „Јас сум ти пријател“ од Ареа…
Дел од графитите се хитот на Тоше „Усни на усни“ со негов портрет, „Рано е да се врзам“ од Мартин Вучиќ, „Ти си проблем“ од „Студени нозе“, „Едно срце“ од Маријана и Росана и други.
(А. П.)
