Винскиот музеј Кавадарци изминативе денови беше презентиран на меѓународен саем во Италија, настан под покровителство на УНЕСКО и на Светската туристичка организација, информираа од Музејот.
– Годинава бевме дел од традиционалното учество на нашата држава на Медитеранската берза за археолошки туризам во Пестум. Пред многубројните посетители, ги претставивме тиквешкото богато културно наследство и лозаровинарската традиција во најголемиот регион за грозје и вино, како белег низ времето на нашиот крај – вели директорката на Музејот, Елизабета Ристова.
Таа наведе дека посетителите биле воодушевени од македонските вино, ракија, ајвар и маџун, од традиционалната тиквешка наутлија, како и од слаткото од тиква, во тиквешко познато како р’чели.
Им се заблагодари на Управата за заштита на културното наследство и на директорката Весела Честоева за можноста Винскиот музеј да се претстави на овој саем, единствен од ваков вид во светот.
