Вештачката интелигенција згреши: Туристи барале непостоечки термални извори

Австралиската туристичка агенција „Тасманија Турс“ беше критикувана откако објави статија генерирана од вештачка интелигенција на својата веб-страница за идилични топли извори во Тасманија кои всушност не постојат.

Блогот ги препорача топлите извори Велдборо, опишани како мирно засолниште популарно кај планинарите, што ги наведува туристите да пристигнуваат на оддалечената локација за да најдат ладна река наместо топли извори. Сопственикот на агенцијата, Скот Хенеси, призна за ABC дека вештачката интелигенција „тотално згрешила“ и објасни дека маркетиншките материјали биле произведени од надворешен персонал додека тој бил во странство.

Локалниот хотелиер Кристи Проберт изјави дека првично добила само неколку повици, но дека бројот на посетители брзо се зголемил.

„Луѓето дојдоа тука барајќи ги изворите. Реката Велд е смрзнувачки студена и главно се работи за трагачи на сафир и калај“, рече таа.

Ан Харди, професорка по туризам, предупреди дека вештачката интелигенција во туризмот може да биде корисна, но често произведува неточни информации. Според истражувањата, околу 90 проценти од плановите за патување генерирани од вештачка интелигенција содржат грешки.

Сепак, Проберт изрази разбирање кон „Тасманија Турс“.

– Изгледаат како фини луѓе, но сите правиме грешки. Велдборо има многу интересни работи, само нема термални извори – додаде таа.