Ако пред повеќе од еден месец предноста на Мекларен во поредокот на возачи во Формула 1 изгледаше недостижна, сега ситуацијата е сосема поинаква. Актуелниот шампион Макс Верстапен ја намали разликата во однос на Ландо Норис и Оскар Пјастри во последниот дел од сезоната и се врати во трката за титулата. По летната пауза, Ред Бул пронајде „рецепт“ со кој драстично му овозможува да победува на различни патеки и во различни услови, враќајќи го холандскиот возач во центарот на вниманието.
Верстапен ја надмина конкуренцијата во три од последните четири трки, со убедливи победи во Италија, Азербејџан и Остин, додека Мекларен не успеа да ја повтори формата од првата половина од сезоната. Разликата што некогаш ја имаше Пјастри во однос на Холанѓанецот е драстично намалена, а разликата во однос на Норис веќе не е толку голема како порано.
„Шансата е тука“, рече Верстапен по победата во Тексас, нагласувајќи дека за првпат оваа сезона отворено гледа реална можност повторно да ја освои титулата.
- Да ми го кажеше тоа некој само пред два месеца, ќе му речев дека е идиот. Но, го подобривме болидот, разбираме како работите функционираат подобро и тоа е главната разлика, посочи Холанѓанецот.
Тој, исто така, нагласи дека Ред Бул мора да биде речиси беспрекорен за време на викендите ако сака да остане во игра до самиот крај.
Мекларен признава дека конкуренцијата го зголемила темпото. Шефот на тимот, Андреа Стела, рече дека треба да се приспособат на поголемата еднаквост на пласманот и притисокот што го носи самата завршница, истакнувајќи дека вистинската специфичност била леснотијата на победите во претходниот дел од годината. Мерцедес и Ферари ја намалија разликата, што дополнително ја комплицира завршницата и петте останати трки.
Заклучокот е јасен. Мекларен веќе нема зона на удобност како на почетокот на сезоната, а Верстапен и Ред Бул влегоа во серија резултати што повторно го отвора прашањето за шампионот. Доколку Ред Бул го задржи своето ниво на ефикасност, борбата за титулата би можела да биде одлучена од нијанси во последните викенди.
