Веќе никогаш нема да го видиме Михаел Шумахер

Здравствената состојба на Михаел Шумахер е енигма со години. Од ужасната несреќа која му се случи на скијање на француските Алпи во 2013 година, малкумина знаат во каква ситуација е, а сега се огласи еден од пријателите на легендарниот возач.

Станува збор за Ричард Хопкинс, кој работеше како висок функционер за тимовите на Ред Бул и Мекларен, а воедно е близок пријател на Михаел. Тој изрази сомневања дека никогаш повторно нема да го види Германецот. Досега е познато дека освен најблиското семејство на Шумахер, само Рос Браун, Жан Тод и неколку од неговите најблиски соработници од неговите денови во Формула 1 можат да го посетат, но сите тие ја чуваат тајната за неговата здравствена состојба.

• Во последно време не сум слушнал ништо за него. Колку што знам, за него се грижи фински лекар. Не мислам дека некогаш повторно ќе го видам Михаел. Се чувствувам непријатно да зборувам за неговата состојба бидејќи сè се чува во тајност и семејството е во право да е така. Можам да зборувам за некои работи, но не сум дел од тој внатрешен круг. Јас не сум ниту Жан Тод, ниту Рос Браун, ниту Герхард Бергер. Тие го посетуваат Михаел, јас сум далеку од тоа, рече Хопкинс.

Го прашаа дали разговарал со некој што го видел Шумахер, а воедно нагласи дека дури и да знае нешто, нема да го каже јавно.

• Не можам да кажам дека сум најдобар пријател со Тод, Рос или со Герхард. Мислам дека дури и да бев најдобар пријател со некој од нив и да ги напиев со црвено вино, немаше да ми се отворат и да ми кажат. Мислам дека од почитта што ја имаат кон Михаел, нема да зборуваат за тоа. Семејството сака така и го почитува тоа. Дури и да знаев нешто, семејството би било разочарано ако го кажам, нагласи Хопкинс.