Пресретнатите ирански комуникации го намалија обемот на штетата предизвикана од американските напади врз нуклеарната програма на Иран, објави во неделата „Вашингтон пост“, повикувајќи се на четири лица запознаени со доверливите разузнавачки информации што циркулираат во американската влада.
Изворот, кој зборуваше под услов да остане анонимен, го потврди извештајот за Ројтерс, но рече дека постојат сериозни прашања за тоа дали иранските претставници биле искрени и ги опиша пресретнатите разговори како несигурни индикатори.
Но, извештајот на „Пост“ е најновиот што покренува прашања за обемот на штетата врз нуклеарната програма на Иран. Протечена прелиминарна проценка од Агенцијата за одбранбено разузнавање предупреди дека нападите можеби го вратиле Иран само неколку месеци назад.
Претседателот Доналд Трамп изјави дека нападите „целосно и крајно ја уништиле“ нуклеарната програма на Иран, но американските претставници признаа дека ќе биде потребно време за да се направи целосна проценка на штетата предизвикана од американските воени напади минатиот викенд. Белата куќа го отфрли извештајот на „Пост“.
„Идејата дека неименувани ирански претставници знаат што се случило под стотици метри урнатини е бесмислена. Нивната програма за нуклеарно оружје е завршена“, ја цитираше „Пост“ портпаролката на Белата куќа, Каролин Левит.
Во интервју емитувано во недела на „Фокс њуз“, Трамп го повтори своето верување дека нападите ги уништиле нуклеарните капацитети на Иран.
„Беше уништен како никој друг досега. И тоа значеше крај на нивните нуклеарни амбиции, барем засега“, рече Трамп.
