Најтрофејниот македонски ракометен клуб Вардар, со триумф го отвори плеј-офот. Лидерот на табелата во Суперлигата славеше на гостувањето кај Алкалоид во Автокоманда со 33:32 и вторпат за кус временски период славеше на гостувањето кај скопските „фармацевти“.
Вардарци победија за крај на регуларниот дел кај овој ривал, а сега го отворија и разигрувањето за титула во ист стил. Дуелот беше вистинско дерби, а го одлучи еден блесок во второто полувреме на вардарци, кои и претходно влегуваа во серии, ама Алкалоид секогаш се враќаше од минусот и внесуваше доза неизвесност.
Најдобар кај Вардар беше Вукашин Воркапиќ со десет гола, го следеа Дмитро Хориха и Франциско Да Силва со по шест гола, а голманот Милош Валах фати девет топки. Кај Алкалоид, Никола Костески имаше 7/7, пред Марко Митев, Марко Стојковиќ и Урош Борзаш со по пет гола.
Шампионот Еурофарм Пелистер, претходно со убедлива победа кај Тиквеш (43:24) ги отвори настапите во плеј-офот во Суперлигата. „Зелените“ важеа за фаворити и целосно ја оправдаа улогата на дуелот во салата „Јасмин“ во Кавадарци.
Најдобар стрелец кај Еурофарм Пелистер беше Дејан Манасков со шест гола, а Рудолв Хакбарт, Филип Кузмановски и Петар и Павле Атанасијевиќ имаа по пет гола. Кај Тиквеш, Богдан Мијушковиќ даде шест, а Томче Стојановски погоди пет пати.
ГРК Охрид на стартот од плеј-офот славеше на гостувањето кај Бутел Скопје со 28:22. Тимот на Ројевиќ имаше мака во првиот дел, но потоа си ја заврши задачата според планираното и ги освои бодовите против ривалот
Гоце Ојлескисо осум гола беше најдобар кај победникот, Дарко Ѓукиќ погоди шест пати, голманот Кристијан Пилиповиќ фати 11 топки. Кај Бутел, Леонид Киселовски имаше шест, а голманот Благојче Трајковски не помогна со вкупно 10 одбрани.
