Узбекистан потврди дека земјата набавила кинески борбени авиони наместо руски

Властите на Узбекистан денес потврдија дека купиле кинески повеќенаменски борбени авиони J-10CE, беше објавено во видео објавено од канцеларијата на претседателот на Узбекистан по повод Денот на независноста, по медиумските извештаи дека Ташкент нарачал 24 борбени авиони.

Според „Саут Чајна Морнинг Пост“ (SCMP), со овој потег Кина го зајакнува своето присуство на пазарот во Централна Азија, кој традиционално е доминиран од Русија со своите борбени авиони.

Претходните извештаи укажуваа дека Узбекистан нарачал 24 авиони J-10CE, но ниту една од двете земји досега официјално не ја потврдила зделката.

Сепак, најмалку шест од овие авиони се прикажани во видео објавено по повод прославата на Денот на независноста на Узбекистан.

Видеото прикажува борбени авиони на воздухопловните сили на Узбекистан на пистата, летајќи во формација, како и церемонијален поздрав со водени топови, кој традиционално се користи за значајни пристигнувања на нови авиони.

Кина, според SCMP, се стреми да ја зголеми меѓународната продажба на едномоторните повеќенаменски борбени авиони J-10CE, а Бангладеш неодамна потврди дека е блиску до постигнување договор за нивно купување.

Пакистан беше првиот странски купувач на овој авион, а до мај минатата година Исламабад доби 20 од овие авиони од Кина, според најновиот извештај на Пентагон за кинеските воени капацитети.

Во извештајот се додава дека Индонезија, Иран и Египет исто така изразиле интерес за купување на овие авиони.

„Узбекистан, според сите мерки, е релативно мал пазар, но значајното е што воопшто купува овие авиони. Ниту руски, ниту француски, ниту авиони од други производители“, рече директорот на Институтот за кинески и воздухопловни студии на американските воздухопловни сили.

Авионите J-10CE се опремени со активни електронски скенирани радари, како и современи системи за електронско војување и размена на податоци, и можат да се користат за борба воздух-воздух и напади врз копнени цели.

Нивното оружје воздух-воздух вклучува ракета со краток дострел PL-10 и PL-15E, ракета водена со радар дизајнирана да напаѓа цели надвор од визуелниот дострел, објави „Танјуг“.