Три „Ер трактори“ и тројца пилоти ќе бидат активни за наредното лето во справување со евентуални пожари. Во ноември годинава уште тројца пилоти за овие летала ќе бидат испратени на обука. Според директорот на Дирекцијата за заштита и спасување, Стојанче Ангелов, пет-шест лица изразиле интерес за пилоти на овие летала и со нив дополнително ќе се разговара.
– Во наредниот период ќе се состанам внимателно со сите нив, се работи за искусни луѓе, и би рекол дека имаат потенцијал лесно да ја завршат обуката – истакна Ангелов во телевизиско гостување.
Интересот за ова работно место во Дирекцијата за заштита и спасување се зголемил благодарение на зголемените плати во авиоодделението на Дирекцијата.
– Кога дојдов на позицијата директор на ДЗС првата работа што ја направив, побарав двојно зголемување на платата на сите воработени во авиооделението. Кога зборувам „сите“, мислам на 12 лица, да не мислите дека таму има 100 луѓе и нивната плата е двојно зголемена. Двојно е зголемена платата и на единствениот пилот на „Ер трактор“, професионално вработен во Дирекцијата, и сега тој е изедначен со платите на пилотите на хеликоптери во полицијата и во армијата – појасни Ангелов.
Инаку, викендов што помина на територијата на државата имаше вкупно четири пожари на отворен простор кои се под контрола и 54 изгаснати пожари. Под контрола се пожарот во повеќенаменското подрачје Јасен каде гореи мешана шума, во општина Гевгелија има приземен пожар на планината Кожуф, близу село Долгаец во општина Долнени гори мешана шума, а во општина Делчено гори градската депонија.
