Уште еден црвен картон за црвените линии

Викендов, тема која се отвори по којзнае кој пат беше носење на заедничка Резолуција за евроинтеграциите со „црвени линии“, која ја понуди опозицискиот лидер, Венко Филипче, а претседателот на ВМРО-ДПМНЕ, Христијан Мицкоски, експресно ја отфрли. „Нашата позиција како Влада ја знаете. Не треба да ја повторувам, така што тој тип итроштини ќе ги оставиме во минатото, кое е поразено. Имаме иднина која е иднина на развој, на реформи на градба…“, изјави премиерот Мицкоски. Претседателот на најголемата опозициска партија, Филипче, предложи Собранието да донесе заедничка резолуција за евроинтеграциите со нашите „црвени линии“ и  доколку се повтори вето од Бугарија дека да се прекинат преговорите со ЕУ.  Филипче вчера најави дека СДСМ ќе изготви документ со јасни позиции за европските интеграции. Слични обиди за постигнување консензус околу националните прашања имаше и во минатото, но поделеноста на власта и опозицијата околу нив остануваше

Евроинтеграциите и Договорот со Бугарија повторно тема за политичка борба меѓу власта и опозицијата. Викендов, тема која се отвори по којзнае кој пат беше носење на заедничка Резолуција за евроинтеграциите со „црвени линии“, која ја понуди опозицискиот лидер, Венко Филипче, а претседателот на ВМРО-ДПМНЕ, Христијан Мицкоски, експресно ја отфрли.

– Мислам дека СДСМ и ДУИ ги потценуваат народот и граѓаните и играат на картата на кратка меморија. Јас ќе ги потсетам дека истите тие веќе имаа една таква декларација во Собранието, да не ги прифаќаат ултиматумите на Софија. Тие за жал, прифатија сè. Ќе ве вратам уште поназад во времето кога исто така имаше една декларација во Парламентот, кога немаше да има промена на името на државата, исто гласана од СДСМ и од пратениците. Па знаете што се правеше и што сè се случуваше кога СДСМ дојде во Владата и кога се менуваше името на државата. Исто така, ќе ве потсетам дека прво ќе ги почитуваа резултатите од референдумот, тој беше неуспешен, не ги почитуваа. На крајот на краиштата, ова е работа што треба да ја водат сериозни луѓе со јасна визија и стратегија. Ова не е игра на итроштини. Видовме што им направија итреците за седум години и на државата и на граѓаните, видовме каде стигнавме, рече Мицкоски. Рече дека на граѓаните и на Македонија им треба јасна политика, јасна визија на борба со аргументи, стекнување пријатели, објаснување на нашите аргументи…

– Нашата позиција како Влада ја знаете. Не треба да ја повторувам, така што тој тип итроштини ќе ги оставиме во минатото, коешто е поразено. Имаме иднина која што е иднина на развој, на реформи на градба… изјави премиерот Мицкоски. Според премиерот, остануваат само предавството, криминалот, и неколкумина поранешни членови во Владата на СДСМ и ДУИ коишто се ултрамилионери.

Филипче и вчера го обвини премиерот дека еднаш барал конструктивност, а другпат одбивал каков било предлог и му порача да настапи државнички за да се одблокира процесот на евроинтеграција.

– Дали е тоа дел од предизборниот фолклор или не имајќи предвид каква кампања водеа минатата година, сега јас навистина не можам да кажам, но факт е дека ништо не се случува на полето на евроинтеграциите, а регионот оди напред. Оди напред Албанија, оди напред Црна Гора со веќе конкретен план дека до 2027 или 2028 година преговорите целосно ќе ги завршат. Ние сме во фаза како практично преговорите да сме ги напуштиле. И тоа е најлошото нешто што може да ни се случи, рече  Филипче. Тој најави дека СДСМ ќе изготви документ со јасни позиции за европските интеграции.

– Ќе спремиме еден документ кој ќе биде работна верзија, кој ќе го понудиме во текот на оваа недела, во кој сметам дека ќе влезат сите аспекти што се важни за државата. Ќе ги споменеме сите претходни декларации, ќе ги споменеме обврските што се преземени во рамките на Францускиот предлог и ќе дадеме предлог како ние како СДСМ сметаме дека треба да се продолжи понатаму, со јасни и точни црвени линии, конечно да знаеме сите на една маса за што зборуваме и како да продолжиме напред, рече Филипче.

Предлогот на Филипче не е прифатлив ни за опозициската ДУИ од каде ги повикаа политичките партии да покажат зрелост и да ја споделат одговорноста за европската агенда, а дека вистинскиот пат до ново вето не е Декларација, туку обврзување дека ќе се задржат правилата што се веќе договорени.

– Ајде да потпишеме договор сите политички партии дека нема да се критикуваме на темата Европска Унија, нема да се напаѓаме, ќе ја преземеме заеднички одговорноста. И ајде да ги почитуваме договорите, зашто тие нè штитат нас, изјави потпретседателот на партијата и поранешниот шеф на дипломатијата, Бујар Османи.

– Секое од тие правила нè штитат нас, зашто тие се филтер за да нема нови барања. Кое било отстапување од тие правила значи влегување во една непозната територија, во која секој ќе може да лиферува свои барања. Затоа треба да ги почитуваме договорите и да продолжиме по патот на членство во ЕУ, рече Османи и додаде дека нови барања и ново вето од страна на Бугарија не смее да има. Според него, на тема евроинтеграции не треба да се прави дневна политика и изборна математика. Османи дава предлог за национален политички договор по примерот на Хрватска, со кој темата за ЕУ веќе нема да се користи за меѓупартиски напади.

Слични обиди за постигнување консензус околу националните прашања имаше и во минатото, но поделеноста околу нив остануваше. Така беше речиси во секоја клучна ситуација со која се соочуваше македонската држава во изминативе 33 години од својата самостојност.