Улицата „Дебарца“ ќе добие нов лик

Реконструкцијата на улицата „Дебарца“ во Општина Центар влегува во завршна фаза.

Градоначалникот Горан Герасимовски информираше дека е поставен нов асфалтен слој на коловозот, а во тек е финалното уредување и приспособување на тротоарите.

-Сообраќајот на улицата „Дебарца“ ќе се врати во нормала многу скоро. Улицата добива нов лик, а со тоа овозможуваме побезбедно и покомотно движење за сите што живеат и се движат тука – изјави Герасимовски.

Се работи за потег долг 220 метри, каде што е обновена коловозна површина од 1.700 квадратни метри, а тротоарот се реконструира на површина од 1.000 квадратни метри.

Овој зафат е дел од поширокиот проект за унапредување на уличната инфраструктура во Центар, кој се реализира со поддршка од Владата во износ од 40 милиони денари, распределени за улиците: „Светозар Марковиќ“ и „Дебарца“.