„Украс“ – изложба на Марјана Костојчиноска-Узунчева во Прилеп

Во Ликовната галерија на Центарот за култура „Марко Цепенков“ во Прилеп, на 12 септември, со почеток од 18.30 часот ќе биде отворена изложбата „Украс“ на Марјана Костојчиноска-Узунчева.

Најновиот креативен подвиг на ликовната уметница Костојчиноска-Узунчева отелотворен во комплексната и интерпретативно повеќеслојна просторна инсталација насловена „Украс”, отвора низа актуелни прашања во врска сo позицијата и третманот на жената денес и родовата (не)еднаквост, посебно во конзервативни и патријархални општества. Инсталацијата се состои од навидум секојдневни предмети кои претставуваат своевиден визуелен код, како дел од нашето етнолошко богатство и културна традиција, но групирани и транспонирани на овој начин и во овој контекст се лишени од баналност и добиваат поширока димензија и симболика… Во централниот горен дел од композицијата се обесени чаршафи за маса, со поголема димензија на кои е испишан текст – „Послужи/ме” (кој е двозначен, замислен како игра на зборови…) и „Одма” кои кореспондираат и се во директна корелација со послужавниците поставени на подот, како и зборот „Украс”, кој, всушност, го претставува јадрото, односно есенцијалниот наративен дел на приказната што ни ја пренесува авторката.

-„Во суштината, сѐ се врти околу овие два збора, особено зборот ’Послужи/ме’ и насловот на инсталацијата ’Украс’. Се работи за збор кој директно дава наредба, да се послужи кафе, да се послужи јадење, да се послужи слатко. Но, исто така може да значи и некој или нешто да послужи за некоја цел, да ’послужи’ за пример. И во двата случаја се работи за искористување или употребување. Во конкретниов случај се работи за жената во општеството во кое живее, се посочува кон изложбата“, вели авторката.

Костојчиноска-Узунчева дипломирала на ФЛУ Скопје – отсек графика и досега реализирала 27 самостојни и повеќе од 50 групни изложби во земјава и во странство.