Украински „Фламинго“ – крстосувачка ракета која може да го смени текот на војната/ВИДЕО

Додека сојузниците на Украина разговараат за модел на безбедносни гаранции за Киев, земјата се зафати самата да ја одврати Русија – со ново оружје кое би можело да го промени текот на војната.

Станува збор за крстосувачката ракета „Фламинго ФП-5“, способна да носи боева глава тешка повеќе од еден тон и да погоди која било цел во европска Русија, пишува Политико.

Ракетата е развиена од „Фаер Поинт“, брзорастечки украински производител на борбени беспилотни летала кои веќе станаа клучно оружје во оваа војна.

– Не сакавме јавно да го објавиме ова, но се чини дека сега е вистинското време. „Фламинго“ е крстосувачка ракета со долг дострел која може да носи боева глава од 1.150 килограми и да лета до 3.000 километри длабоко во Русија. Од идејата до првите успешни тестови, поминаа помалку од девет месеци. Не можам да ја откријам точната брзина, но можам да кажам дека е побрза од која било ракета што ја имаме во моментов. „Таа е целосно произведена во Украина“, рече извршната директорка на компанијата, Ирина Терех.

Необичното име на ракетата и оригиналната боја – светло розов врв на кој се наоѓа боевата глава – беа создадени како внатрешна шега во рамките на компанијата, како признание за честопати занемарената улога на жените во светот на оружјето.

„Нашите први ракети беа розови и ги поминаа сите тестови обоени така. Потоа моравме да ја смениме бојата за камуфлажа, но жената задолжена за производството е сè уште таму – женскиот допир во ракетите“, рече Терех.

Ракета со ваков дострел веќе го привлече вниманието на Москва. Државната новинска агенција ТАСС објави статија во која го намалува значењето на „Фламинго“, тврдејќи дека е базиран на британски дизајн, тврдење што Украинците категорично го негираат.

Според официјалните бројки, ракетата веќе е во масовно производство. Украинскиот претседател Володимир Зеленски објави дека во август се произведени 211 ракети и додаде дека до декември ќе има „многу повеќе“.