Украинците за одбраната на Украина плаќаат третина годишна плата, а Евопејците 95 евра

Трошоците на ЕУ за украинските одбранбени напори, што вклучуваат и директни трошења на Унијата и билатерални трошења на земјите членки, изнесуваат околу 72 милијарди евра за тригодишниот период од 2022 до 2024 година. Изразено како процент од БДП, ова е околу 0,3 отсто од БДП на ЕУ годишно.

Пресметките покажуваат дека секој граѓанин на ЕУ за одбраната на Украина  плаќа по околу 95 евра годишно. Бројките не се исти за целата Унија, бидејќи некои земји придонесуваат повеќе, малку или воопшто не придонесуваат надвор од заедничкиот буџет на ЕУ, како на пример, Унгарија.

Украинците, пак, за потребите на одбраната на својата земја плаќаат по една третина од својата годишна плата. Просечната годишна плата на еден украински граѓанин е околу 3.500 евра, за разлика од ЕУ каде изнесува околу 29.600 евра според „Евростат“, или САД, каде изнесува околу 56.880 евра.

Во следната деценија, на Украина ќе ѝ биде потребна реконструкција во вредност од 448,6 милијарди евра, што е речиси девет пати повеќе од буџетот за одбрана за 2025 година. Четвртата процена на штетите и потребите на Светската банка, објавена на 25 февруари, документираше 150 милијарди евра директна штета на инфраструктурата. Штетата и уништувањето на станбениот фонд, проценети на 48,8 милијарди евра влијаат на 2,5 милиони домаќинства и бараат 71 милијарда евра за реконструкција. Транспортната инфраструктура претрпе штета од 31,6 милијарди евра, а за целосна реконструкција се потребни 66,7 милијарди евра. Штетите во енергетскиот сектор изнесуваат 58,2 милијарди евра.

Овие бројки ја опфаќаат само економската страна на војната. Многу поголем товар се изгубените животи, раселените семејства и опустошените заедници, кои ниту една сметководствена табела не може целосно да ги опфати во бројки.

Иако буџетот за одбрана на Украина од 55 милијарди евра ги одразува непосредните потреби за преживување, сеопфатните воени трошоци покажуваат вкупен товар од 700 милијарди евра што вклучува реконструкција, хуманитарни потреби и економски загуби. Расходите за одбрана претставуваат само една компонента од финансиското влијание на војната врз земјата.