Украина сепак подготвена на компромис? Зеленски го доби американскиот нацрт-план: „Ќе разговара со Трамп, ги поддржуваме сите значајни предлози“

Украинскиот претседател Володимир Зеленски денес официјално го прими нацрт-планот на Соединетите Американски Држави за прекин на војната со Русија, соопшти кабинетот на Зеленски, истакнувајќи дека Зеленски ќе разговара за главните точки со американскиот претседател Доналд Трамп во наредните денови.

Во соопштението се вели дека Украина е подготвена за конструктивна соработка со САД и партнерите во ЕУ и светот со цел постигнување мир.

– Претседателот на Украина очекува во наредните денови да разговара со претседателот Трамп за достапните дипломатски можности и главните точки потребни за мир – соопшти Кабинетот на украинскиот претседател, пренесува РБК Украина.

Додадено е дека новиот план, според американските претставници, би можел да ја интензивира дипломатијата, објави Кабинетот на украинскиот претседател.

– Украина бара мир уште од првите секунди од руската инвазија и ние ги поддржуваме сите значајни предлози што можат да го доближат вистинскиот мир. Украина ги поддржува предлозите на претседателот Трамп за прекин на крвопролевањето од почетокот на оваа година – се вели во соопштението.

Зеленски се сретна со секретарот на американската армија, Ден Дрискол, и генерали во Киев порано денес, а потоа ќе следи состанок во нов формат, на кој ќе присуствува и секретарот на Советот за национална безбедност и одбрана, Рустем Умеров.

Висок функционер на американската администрација изјави за NBC порано денес дека Трамп оваа недела одобрил план од 28 точки за мир меѓу Русија и Украина.

Според изворите, планот бара Украина да ги отстапи преостанатите делови од Донбас, да ја преполови големината на своите вооружени сили и да се откаже од клучните категории оружје.

Исто така, ќе се намали американската воена помош, ќе се забрани распоредување трупи од која било страна на украинска територија и ќе се запре снабдувањето со западно оружје со долг дострел.

Планот, исто така, вклучува признавање на рускиот јазик како службен јазик, како и формален статус за локалната гранка на Руската православна црква.

Американските медиуми објавија во среда, повикувајќи се на извори, дека планот е развиен од американски и руски претставници, а според неофицијални податоци, во неговото создавање учествувал претставникот на рускиот претседател, Кирил Дмитриев.