Поранешниот генерален секретар на НАТО, Андерс Фог Расмусен, изјави дека Украина се соочува со „вечна војна“ и бавна ерозија на територијата доколку Европа драматично не го зголеми притисокот врз Русија.
Расмусен во интервју за „Гардијан“ изјави дека притисокот врз Русија би вклучувал распоредување војници и воспоставување ракетни и беспилотни штитови на територијата на членките на НАТО за да се заштити Украина од руски напади врз нејзината инфраструктура.
Според него, доколку земји како Полска се согласат да имаат таква воздушна одбрана инсталирана на нивна територија, Русија би разбрала дека нападот врз нив би бил напад врз целиот НАТО сојуз.
„Мораме да му помогнеме на украинскиот народ да се заштити од руските ракети и беспилотни летала со изградба на воздушен штит што ќе им помогне на Украинците да соборуваат руски ракети и беспилотни летала. Земјите од НАТО што се граничат со Украина би можеле да бидат локација за систем за воздушна и ракетна одбрана на НАТО“, рече Расмусен, кој го водеше НАТО од 2009 до 2014 година.
Тој, исто така, повика на распоредување на европски заштитни сили за Украина, пред договорот за прекин на огнот со Русија.
„Ако не спроведеме голема промена во стратегијата, ќе се соочиме со вечна војна. Путин нема поттик да се вклучи во мировни преговори сè додека мисли дека може да победи на бојното поле. Потребна ни е промена во брзината и начинот на размислување“, рече Расмусен.
Според него, цврстите безбедносни гаранции би му го олесниле на украинскиот претседател Володимир Зеленски да му предложи мировен договор на својот народ, што вклучува губење на украинската територија.
Расмусен рече дека Европа сè уште не е свесна за заканата што ја претставува Русија и повика на користење на замрзнатите руски средства за Украина.
