Украдениот накит од Лувр снимен на паркинг во предградието на Париз

Безбедносна камера на паркинг во североисточното предградие на Париз, Обервилиер, еден час по кражбата во музејот Лувр на 19 октомври минатата година, снимила двајца од четворицата крадци кои дошле на паркингот со скутери, како вадат тиара од црна торба, за која истражителите веруваат дека може да е украдената тиара на царицата Евгенија.

На снимката до која дошла телевизијата BFM, двајцата мажи се гледаат како се вознемируваат откако влегле на паркингот, пребарувајќи низ џебовите на јакните и конечно вадејќи ја тиарата од црна торба.

Видеото понатаму прикажува мали предмети, за кои истражителите веруваат дека може да бидат скапоцени камења.

Според снимките од безбедносните камери, откако избегале од Лувр, два скутери во сообраќајот се упатиле јужно од Париз, а потоа групата од четири крадци се поделила на два дела, две лица продолжиле со скутерите, а две лица продолжиле во бело комбе, при што скутерите се движеле кон исток, додека белото комбе се движело кон запад.

Според извор близок до истрагата, однесувањето на двајцата мажи на паркингот укажува на форма на разочарување и фрустрација, што доведува до хипотезата дека накитот можеби бил оштетен или изгубен пред да пристигне во Обервилиер.

Подоцна истиот ден, бело комбе исто така влезе на истиот паркинг, а сите три возила поврзани со крадците беа отстранети неколку дена подоцна.

Накитот украден од Лувр сè уште не е пронајден, а четворица мажи се уапсени и се во притвор.

На 19 октомври минатата година, осум парчиња историски накит, вклучувајќи тијари и ѓердани од француската колекција на крунски скапоцености, беа украдени од музејот Лувр, чија вредност се проценува на 88 милиони евра.

Кражбата се случи во галеријата Аполо за помалку од осум минути, а украдените предмети вклучуваа дела поврзани со царицата Евгенија и кралицата Марија-Амелија.