По 70 години од изградбата, ООУ „Гоце Делчев“ во Долно Лисиче ќе добие спортска сала. Премиерот Христијан Мицкоски, министерката за образование и наука – Весна Јаневска, како и в.д. градоначалникот на Општина Аеродром – Дејан Митески вчера го поставија камен-темелникот на овој објект во кој ќе спортуваат над 200 дечиња.
– Овие деца во минатото немаа соодветни услови за спортување и за реализирање на предметот Физичко и здравствено образование. Спортската сала, која ќе биде на површина од 650 квадратни метри, се гради со финансиска поддршка од Министерството за образование, во износ од 30 милиони денари – информираше Митески.
Тој додаде дека градежните работи ги изведува фирмата „Гранит“ и се очекува тие да бидат завршени за не повеќе од 10 месеци. Освен тоа, Митески најави дека со владина поддршка ќе се реконструира и водоводната мрежа во Долно Лисиче.
Оваа сала, освен за одржување на редовната настава во рамките на училиштето, ќе претставува и место каде што жителите на Долно Лисиче ќе може да тренираат и да се запознаат со различни спортови за што досега одеа во други населби.
– Трчањето релаксира, шутирањето кон голот дава концентрација и самодоверба, а групните игри развиваат планирање, критичко мислење и, секако, покрај физичката активност, физичкото нуди и психична стабилност – истакна Јаневска.
Таа информираше дека Министерството во моментов вложува околу 2 милијарди денари за подобрување на инфраструктурата во училиштата, во соработка со Владата и со локалните самоуправи.
Мицкоски нагласи дека е среќен што е поставен камен- темелник на еден објект што ќе биде место каде што повеќе од 200 дечиња ќе спортуваат, ќе се дружат и ќе го градат својот дух.
– Јас сум сигурен дека колку повеќе вакви објекти и корисници на вакви објекти ќе имаме толку поздрав дух и толку понапредно општество ќе имаме, општество што ќе биде дом за сите – нагласи Мицкоски.
(А. П.)
