Училиштата во Карпош подготвени за новата учебна година 

Сите училишта на територијата на општина Карпош ги исполнуваат условите за непречено одвивање на наставата од аспект на безбедноста и се целосно подготвени за почетокот на учебната  2025/2026 година.

Ова било констатирано на средбата на градоначалникот Стевчо Јакимовски со директорките на сите основни училишта.

Од Општина Карпош велат дека воедно била утврдена и состојбата на вработените во училиштата, потребата за некои наставници, стручни соработници, како и за административно-технички персонал.

–Училиштата во текот на летните месеци беа бојадисани со еколошка боја, беше реконструирана и електричната мрежа каде што постоеше потреба за тоа, беа поставени нови противпожарни апарати во училишните објекти и беа обновени некои од хидрантските мрежи – информираат од локалната самоуправа.

Оттаму додаваат дека од овој септември воспитно-образовниот процес во основните училишта низ Карпош ќе се одвива по најсовремени стандарди, за што се обезбедени наменски средства од буџетот.

– Набавени се смарт-панели во сите училници и кабинети, за сите ученици од I до IX одделение. Секое училиште се опреми со нова компјутерска училница за што беа набавени нови 254 компјутери. Поставени се фотоволтаични системи за заштеда на електрична енергија и во рамки на училиштата на сите спортски игралишта е поставена вештачка трева – соопштија од Општина Карпош.

Инаку, овој први септември прв пат во училишните клупи ќе седнат 608 првачиња.