Македонија е ставена на мапата на Бахус класик релито на олдтајмери. Од 27 септември над 30 возила од премиум ранг листата што досега не се видени во Македонија и регионот седумдена ќе возат низ нашата држава. Најавено е учество на претставници од 11 држави меѓу кои: САД, Германија, Австрија, Англија, Белгија, Швајцарија, Луксембург, Бугарија, Грција…
Организаторите Игор Стефановски и Благоја Петровски, за МИА откриваат дека учесниците ќе возат по утврдена рута од вкупно 1.060 километри низ две држави со 27 специјални етапи. Ќе се вози според правилата што ги налага ваков тип рели, но дека целиот настан ќе биде надополнет со посета на најзначајните културно-историски споменици и винарии со што ќе биде презентирана и историјата и традицијата на овие простори.
– Рутата што ќе се вози е веќе утврдена. За време на седумдневното рели ќе ги посетиме Хераклеја во Битола, Охрид како најзначајна туристичка дестинација, Бигорскиот манастир…, а самото име на релито дадено по римскиот бог на виното укажува дека неминовна е и дегустацијата на добро познатите македонски вина – велат Стефановски и Петровски за МИА.
Со ваков настан Македонија ќе се позиционира на светската мапа на вакви релија, а учесниците одблизу ќе се запознаат и со македонската историја и добро познатата македонска храна.
– Придобивките се големи. Земјава ќе стане препознатлива по настани од ваков вид, а со доаѓањето на луѓе од овој калибар во земјава и промовирањето на нашите културно-историски знаменитости неминовно ќе придонесеме и во развојот на туризмот – нагласуваат Стефановски и Петровски.
Задоволни се од одѕивот на учесници кои веќе го потврдиле учеството на релито, а некои од нив првпат ќе ја посетат земјава. Ова, според нив, ветува успешен почеток на еден ваков меѓународен настан кој, како што откриваат, имаат намера да прерасне во традиција и да стане препознатлив бренд во државата.
– Иако е мала по големина, Македонија е држава која има што да понуди, а ова е добра можност за промоција на нашата култура и историја – велат Стефановски и Петровски.
Релито првпат беше промовирано на „Classic Gala Schwetzingen 2024“, еден од најпрестижните настани за олдтајмери во Европа што се одржа во барокниот дворец во германскиот град Швецинген. Стефановски и Петровски беа единствените претставници од земјава кои се претставија со „Fiat Abarth 1000TC Gr.5 Replica“, уникатен примерок кој привлече интерес кај присутните посетители.
Релито веќе е впишано и во календарот на Светската федеративна асоцијација на историски автомобилски клубови која обединува повеќе од 2,5 милиони љубители на олдтајмери од повеќе од 70 држави.
