На 04.01.2026 година, здружението „Убавините на Скопска Црна Гора“ организира искачување до врвот Ѓафа, кој е на надморска височина од 1.068 метри.
– Движењето ќе започне од последната автобуска станица во Стајковци и по Брњарски пат ќе се продолжи кон Страчинскиот Kанал, па нагоре кон ливадите кон Студено и потоа кон Ѓафа – соопштија од здружението „Убавините на Скопска Црна Гора“.
Стартот на турата ќе биде во 08:30 часот од последната автобуска станица во Стајковци, а дотаму може да се дојде со сопствен превоз или со автобусот со број 65в, кој тргнува од Транспортниот центар во 07:45 часот, додека автобус за назад има 15:30 часот.
Се работи за средно тешка тура, која е долга 15 километри, со висинска разлика од 700 метри.
– По патеката ќе се движиме во група и ќе правиме повеќе кратки паузи и една поголема пауза на врвот Ѓафа од каде што ќе имаме поглед кон Скопје од едната страна, а од другата страна кон Куманово во далечина – појаснуваат од здружението.
Од опрема е потребно: разгазени гојзерици, гамашни, кабаница за заштита од дожд, стапчиња за помош при движење по патеката, вода и храна според своите потреби, челна ламба.
