Предлогот на Европската комисија за зголемување на надоместокот за електронско овластување за патување (ETIAS) од 7 на 20 евра наиде на остри критики од европската туристичка индустрија, која предупредува дека таквата одлука не е ниту транспарентна ниту соодветна за сегашните околности.
Во заедничка изјава на неколку здруженија од туристичкиот сектор се наведува дека зголемувањето од речиси три пати во споредба со првично договорените 7 евра би можело да има негативни последици врз привлечноста на Европа како глобална дестинација.
Иако Европската комисија тврди дека инфлацијата и дополнителните оперативни трошоци се причините за зголемувањето на цените, претставниците на индустријата сметаат дека ваквите објаснувања не се поткрепени со конкретни анализи.
„Недостасуваат информации за тоа дали биле разгледани други опции, како што е надомест од 10 или 12 евра, како и детална анализа на трошоците за системот“, се вели во соопштението, во кое се повикува Комисијата да ги објави сите релевантни информации пред да донесе одлука.
Дополнителен проблем е споредбата со слични системи како што се британскиот ETA и американскиот ESTA, бидејќи според индустријата, ваквите паралели не се оправдани без солидна правна и финансиска основа во европски контекст.
ETIAS, како електронска дозвола за влез во ЕУ, е дел од поширок систем за гранична контрола. Иако сè уште не е во функција, неговото лансирање се очекува во последниот квартал од 2026 година, додека претходно, од октомври оваа година, ќе започне постепеното воведување на EES системот за евидентирање на влезови и излези.
Патниците од трети земји без виза ќе мора да пополнат онлајн апликација, а обработката ќе трае неколку минути во повеќето случаи. Оваа апликација нема да биде потребно да ја пополнат малолетници, лица над 70 години, членови на семејства на граѓани на ЕУ или носители на визи за престој или работа од ЕУ.
