Тротинети како камикази!

Има случаи кога тротинетите се возат во спротивна насока, кога на еден тротинет се качуваат и по двајца, дури и тројца, се возат на пешачки премини, па дури и на коловози, како резултат на што има зголемен број на сообраќајни незгоди со повреди. Од Министерството за внатрешни работи велат дека во првата половина на 2025 година се случиле 53 сообраќајни незгоди со електрични тротинети во кои настрадале вкупно 46 учесници во сообраќајот. Од нив едно лице, за жал, починало. Воедно, 10 лица се здобиле со тешки телесни повреди, од кои шест биле деца, додека со телесни повреди се здобиле 35 лица, од кои 10 биле деца. Токму заради тоа, МВР заедно со Републичкиот совет за безбедност на сообраќајот на патиштата (РСБСП) периодов спроведуваат кампањата за намалување на бројот на повредени лица кои управуваат електрични тротинети

Секојдневно се зголемува бројот на тротинети низ градот, но и на сè позачестените незгоди кои се случуваат поради нивното несоодветно возење. Има случаи кога се возат во спротивна насока, кога на еден тротинет се качуваат и по двајца, дури и тројца, се возат на пешачки премини, па дури и на коловози, а резултат на тоа се зголемениот број сообраќајни несреќи.

Од Министерството за внатрешни работи велат дека во првата половина на 2025 година се случиле 53 сообраќајни незгоди со електрични тротинети во кои настрадале вкупно 46 учесници во сообраќајот. Од нив едно лице, за жал, починало. Воедно, 10 лица се здобиле со тешки телесни повреди, од кои шест биле деца, додека со телесни повреди се здобиле 35 лица, од кои 10 биле деца. Поради непочитување на правилата за возење на тротинет само во еден ден, на 6 август МВР издаде 46 прекршочни платни налози за возачи на електрични тротинети за сторени сообраќајни прекршоци и се соочени со законски предвидените глоби.

Токму заради тоа, МВР заедно со Републичкиот совет за безбедност на сообраќајот на патиштата (РСБСП) периодов спроведуваат кампањата за намалување на бројот на повредени лица кои управуваат електрични тротинети.

– Преку видеоедукативен спот укажуваме на законските обврски и препораки за безбедно возење со е – тротинети, споделуваме лично сведоштво од лице кое доживеало несреќа со електричен тротинет, како и докторска експертиза за тешките последици од повредите настанати како резултат на несреќи со вакви возила – информираат од МВР.

Оттаму додаваат дека целта на кампањата е да се зголеми свесноста, да се поттикне одговорно однесување и да се придонесе кон побезбедно учество на електричните тротинети во сообраќајот.

Портпаролот на РСБСП, Дејан Андоновиќ укажува на тоа како правилно треба да се вози тротинет за да не се случуваат незгоди и инциденти.

Тој истакна дека тротинет не смеат да возат лица до 14 години, на него не смеат да се возат двајца или тројца, туку треба да го управува само еден, не смее да се шета милениче додека се вози тротинет,  забрането е возење на тротинет по коловоз, што во последно време често се случува. Воедно, укажува  дека тротинетот треба да се вози по велосипедска патека и тоа со брзина од 25 километри на час, додека по пешачка патека треба да се вози со шест километри на час.

– Но  треба да нагласам и тоа дека електричниот тротинет треба да се вози секаде каде што има услови за тоа – истакна Андоновиќ.

Тој додаде дека носењето на кацига при возење тротинет не е задолжително, но сепак, се препорачува.  Исто така, треба да се носи  рефлектирачки елек во периодот од 19:00 часот навечер до 5 часот наутро.

Андоновиќ потврди дека има зголемен број на сообраќајни незгоди со тротинет.

– Јас лично имам видено како на еден тротинет се возат татко, мајка и бебе, што е недозволиво и надвор од памет – истакна  Андоновиќ, додавајќи дека непрописното возење на тротинет доведува до несакани последици.

Затоа, тој апелира посебно до родителите да не им даваат тротинет на децата под 14 години и да не им даваат пари за нивно изнајмување.

Инаку, според Законот за безбедност на сообраќајот на патиштата прекршочен платен налог со глоба во износ од 80 евра во денарска противвредност ќе му се издаде, согласно со одредбите од овој закон, на возачот кој ќе го управува електричниот тротинет на површини спротивно на правилата. Прекршочен платен налог со глоба во износ од 120 евра во денарска противвредност ќе му се издаде, согласно со одредбите од овој закон, на возачот кој ќе се движи со брзина поголема од 25 километри на час, односно со поголема брзина од шест  километри на час, на пешачка патека односно друга пoвршина наменета за пешаци. Прекршочен платен налог со глоба во износ од 80 евра во денарска противвредност ќе му се издаде на родителот, односно старателот на дете кое ќе го управува електричниот тротинет на површини спротивно на правилата. Прекршочен платен налог со глоба во износ од 120 евра во денарска противвредност ќе му се издаде на родителот, односно старателот на дете кое ќе се движи со брзина поголема од 25 километри на час, односно со поголема брзина од шест километри на час, на пешачка патека односно друга површина наменета за пешаци. Прекршочен платен налог со глоба во износ од 50 евра во денарска противвредност, ќе му се издаде на возачот кој постапува спротивно на овие правила. Прекршочен платен налог со глоба во износ од 50 евра во денарска противвредност ќе му се издаде на родителот, односно старателот на дете кое постапува спротивно на правилата. Прекршочен платен налог со глоба во износ од 50 евра во денарска противвредност ќе му се издаде на возачот кој ќе превезува други лица за време на управувањето. Прекршочен платен налог со глоба во износ од 50 евра во денарска противвредност ќе му се издаде на родителот, односно старателот на дете кое управува електричен тротинет, а е под 14 годишна возраст. Прекршочен платен налог со глоба во износ од 50 евра во денарска согласно со законот ќе му се издаде на возачот кој нема да носи рефлектирачки елек. Прекршочен платен налог со глоба во износ од 50 евра во денарска противвредност ќе му се издаде на родителот, односно старателот на дете кое нема да носи рефлектирачки елек.

(А.П.)