Tројно убиство во Црна Гора: Полицијата трага по вооружениот убиец, на граѓаните им е наредено да останат во своите домови

Три лица загинаа денес на стрелиштето „Чешка Збројевка“ во близина на Даниловград; полицијата спроведува интензивна потрага по осомничениот, кој побегнал од местото на настанот по извршеното кривично дело и за кого се верува дека е вооружен. Граѓаните се повикани да не ги напуштаат своите домови додека трае потрагата.

Управата на полицијата на Црна Гора започна опсежна потрага по лицето осомничено за тројното убиство што се случи на стрелиштето „Чешка Збројевка“ во близина на Даниловград, пренесува Vijesti.me.

Според официјалните информации, жртвите се П.Г. (24) од Подгорица, М.Р. (67) од Даниловград и Н.К. (20) од Подгорица; сите тројца биле вработени на стрелиштето.

Полицијата се сомнева дека напаѓачот побегнал од местото на настанот по злосторството и дека сè уште е вооружен.

Полицијата ги повикува граѓаните да останат во своите домови
Поради проценката дека осомничениот може да претставува опасност за јавноста, Управата на полицијата издаде предупредување со невообичаено силен тон.

„Со оглед на тоа што вооружениот сторител побегнал од местото на настанот и претставува опасност, ги повикуваме граѓаните да останат во своите домови сè додека полицијата не го стави осомничениот под контрола“, се наведува во соопштението.

На граѓаните им се советува да бидат особено внимателни при контакт со непознати лица и веднаш да пријават секакво сомнително однесување во полицијата.

Осомничениот наводно го изнајмил оружјето
Според првичните информации, лицето по кое трага полицијата претходно изнајмило оружје во стрелиште.

Според „Вијести“, жртвите биле инструктори во стрелиштето.

Полицијата во моментов спроведува криминалистичка истрага и обезбедува снимки од безбедносните камери, кои би можеле да бидат клучни за реконструкција на настаните и за идентификација на осомничениот.

Надлежните најавија дека, откако ќе се соберат потребните информации, ќе објават фотографија и опис на лицето по кое се трага.

Специјални единици вклучени во потрагата
Во операцијата се вклучени Специјалната полициска единица и Специјалниот полициски одред, а поширокото подрачје е блокирано на повеќе локации.

„Воспоставена е блокада на непосредната и околната област во неколку градови. Се преземаат сите неопходни мерки и дејствија во координација со надлежното обвинителство за да се идентификува и лоцира сторителот и да се расветлат околностите на инцидентот“, соопштија од Управата на полицијата.

Претходно, околу 17:00 часот, сопственикот на стрелиштето ја известил полицијата дека на лице место пронашл безживотни тела на три лица.

Истрагата е во тек
Полицијата, во соработка со Вишото државно обвинителство во Подгорица, врши увид на лице место и собира докази за да се утврдат сите околности поврзани со употребата на огнено оружје.

Потрагата по осомничениот е во тек, а полицијата апелира до граѓаните да бидат внимателни и да не му приоѓаат на никого што одговара на описот на осомничениот, туку веднаш да ја известат полицијата.