Во вторник, 24 февруари 2026 година, ќе се навршат точно четири години од почетокот на руската инвазија на Украина. Претседателот на Европскиот совет, Антонио Коста, и претседателката на Европската комисија, Урсула фон дер Лајен, требаше да отпатуваат во Киев за да го објават 20-тиот пакет санкции против Русија и заем од 90 милијарди евра што на Киев очајно му се потребни за да преживее.
Сепак, овие планови се вратија како бумеранг бидејќи Унгарија, која под владеењето на премиерот Виктор Орбан многумина ја сметаат за руски – и не само руски – „тројански коњ“ во Европската Унија, претходно објави дека ќе го блокира 20-тиот пакет санкции и заемот за Киев сè додека Украина не го врати транзитот на нафта преку нафтоводот „Дружба“.
Будимпешта го обвинува Киев дека одложува со поправката на нафтоводот, кој беше оштетен во напад со беспилотни летала и ја отсече Унгарија од евтина руска нафта.
„Чекор назад“
Високиот претставник на ЕУ за надворешни работи и безбедносна политика, Каја Калас, потврди дека министрите за надворешни работи не успеале да постигнат договор, нарекувајќи го тоа „чекор назад“.
Унгарскиот министер за надворешни работи, Петер Сијарто, изјави дека Унгарија нема да дозволи Киев да донесува големи одлуки, нарекувајќи го прекинот на транзитот на нафта „јасна политичка уцена“ од страна на Украина. Унгарскиот премиер Виктор Орбан, исто така, најави прекин на испораките на дизел гориво за Украина и отфрлање на воен заем.
„Политичка уцена“
Неговиот сојузник, словачкиот премиер Роберт Фицо, се закани дека ќе го прекине снабдувањето со електрична енергија на Украина доколку протокот на нафта низ Дружба не продолжи.
Словачка и Унгарија остануваат во голема мера зависни од руската нафта, додека Словачка е исто така витален извор на електрична енергија за Украина, чија мрежа е оштетена од руските напади.
Киев остро ги осуди потезите, отфрлајќи ги како „ултиматуми и уцена“. Украинското Министерство за надворешни работи им порача на унгарската и словачката влада дека треба да ги испратат своите ултиматуми до Кремљ, а не до Киев.
Во меѓувреме, министрите за надворешни работи од другите земји-членки на ЕУ го изразуваат својот гнев поради опструкцијата од страна на Унгарија. Полскиот министер за надворешни работи, Радослав Сикорски, рече дека е шокиран од одлуката на Унгарија и нејзиниот недостаток на солидарност со жртвите на агресијата.
