Трогателна исповед на поранешен НБА-кошаркар: Имам смртоносен тумор на мозокот, не чекам да ме убие!

Поранешниот НБА-играч, Џејсон Колинс, кој воедно беше и првиот кошаркар што јавно открил дека е геј, сподели вознемирувачки вести за својата борба со тумор на мозокот. Во емотивно писмо до ЕСПН, 46-годишникот откри дека му е дијагностицирана една од најагресивните форми на рак.

Неговото семејство објави во септември дека се соочува со здравствени предизвици, но Колинс сега одлучи самиот да ја раскаже целата приказна.

• Пред неколку месеци, моето семејство објави кратка изјава во која се вели дека имам тумор на мозокот. Но, сега е време луѓето да слушнат директно од мене. Имам глиобластом во четврти стадиум, една од најсмртоносните форми на рак на мозокот. Се појави неверојатно брзо – истакна Колинс.

Поранешниот кошаркар откри дека првпат развил симптоми во август додека се подготвувал со својот  партнер, Брансон Грин, за на пат.

• Требаше да одиме на САД Опен во август, како што правиме секоја година, но кога дојде да нè земе автомобилот на аеродром, не бев ни приближно подготвен. И првпат по децении, го пропуштивме летот затоа што не можев да се концентрирам на пакувањето. Имав чудни симптоми како овие една или две недели, но ако не беше навистина лошо, ќе го пребродев. Јас сум спортист – вели Колинс.

Сепак, наскоро стана јасно дека е сериозна ситуацијата.

• Сепак, нешто беше навистина лошо. Бев на компјутерска томографија во УЦЛА вкупно пет минути пред да ме извлече техничарот и да каже дека ме праќа кај специјалист. Имав доволно компјутерски скенери во текот на животот за кои знам дека траат подолго од пет минути. И што и да виде техничарот на првите снимки, знаев дека е нешто лошо – напиша тој.

Неговата состојба брзо се влошила.

• Според моето семејство, за неколку часа, мојата ментална јасност, краткорочната меморија и разбирањето исчезнаа, претворајќи ме во НБА-верзија на Дори од „Барајќи го Немо“.

Колинс живописно ја опиша природата на својата болест.

• Мојот глиобластом е „мултиформен“. Замислете чудовиште со пипала што се шират низ долната страна на мојот мозок, со ширина на бејзбол-топка. Биопсијата откри дека мојот глиобластом има фактор на раст од 30 %, што значи дека во рок од неколку недели, ако не се преземе ништо, туморот ќе се прошири и, веројатно, ќе бидам мртов во рок од шест недели до три месеци – истакна Колинс.

Затоа тој одлучил да продолжи со агресивен третман.

• Ќе се обидеме прво да го нападнеме на начини на кои никогаш порано не бил нападнат: зрачење, хемотерапија и имунотерапија, која сè уште се изучува, но е најперспективна за овој вид рак – рече тој.

Тој е свесен за лошата прогноза што доаѓа со стандардниот третман.

• Бидејќи мојот тумор не може да се оперира, ако се одлучам само за стандардна нега – зрачење и ТМЗ, просечната прогноза е само 11-14 месеци. Ако тоа е сето време што ми преостанува, би сакал да го поминам обидувајќи се со третман што еден ден би можел да стане нов стандард на нега за сите – храбро заклучи тој.

Џејсон Колинс остави длабока трага во НБА, каде што помина 13 сезони играјќи за шест различни тима. Двапати играше во финалето на НБА со Њу Џерси нетс, во 2002 и во 2003 година. Сепак, тој остави најголема трага надвор од теренот. Се пензионираше од кошарката во ноември 2014 година.